նախընտրելի դարձնել
Որոշ ճանաչողական թեստեր ի վիճակի են հայտնաբերել գլիոմայի՝ գլխուղեղի ամենատարածված և վտանգավոր ուռուցքներից մեկի նշանները դեռևս ակնհայտ ախտանիշների ի հայտ գալուց առաջ։ Այս եզրահանգմանն են եկել Քեմբրիջի համալսարանի գիտնականները։ Աշխատանքը հրապարակվել է PLoS One ամսագրում։
Գիտնականները վերլուծել են նախկինում հրապարակված 17 ուսումնասիրությունների տվյալները։ Դրանցում գնահատվել է ճանաչողական թեստերի ճշգրտությունը որպես գլխուղեղի ուռուցքի կանխատեսման գործիքներ։
Արդյունքները ցույց են տվել, որ հիշողության, ուշադրության, խոսքի և մտածողության արագության գնահատման օգտագործվող մեթոդների կեսից ավելին բարձր հավաստիությամբ թույլ են տալիս բացահայտել գլիոմա ունեցող հիվանդների և առողջ մարդկանց միջև եղած տարբերությունը։
Ամենաարդյունավետը Montreal Cognitive Assessment (MoCA) կարճ թեստն է, որը տևում է ընդամենը մի քանի րոպե և կարող է անցկացվել ընդհանուր պրակտիկայի բժիշկների կողմից։ Այն օգնում էր արդյունավետորեն տարբերակել ուռուցք ունեցող հիվանդների և հսկիչ խմբի մասնակիցների ուղեղի աշխատանքի առանձնահատկությունները։ Գիտնականների խոսքով՝ MoCA-ն կարող է դառնալ վաղ սքրինինգի հեռանկարային գործիք։
Հեղինակները շեշտում են, որ ճանաչողական թեստերը կարող են կարևոր լրացում դառնալ առաջնային ախտորոշման համար՝ օգնելով բժիշկներին ժամանակին ուղղորդել հիվանդներին ՄՌՏ և այլ հետազոտությունների։ Սակայն, այս մեթոդները կլինիկական պրակտիկայում ներդնելու համար անհրաժեշտ են հետագա ուսումնասիրություններ՝ դրանց ճշգրտությունն ու հուսալիությունը իրական կլինիկական պրակտիկայի պայմաններում գնահատելու համար։
