Շատերը ակնաբույժի են դիմում միայն այն դեպքում, երբ շրջապատող առարկաները վատ են տեսնում: Սակայն կան նաեւ շատ այլ ախտանիշներ, որոնք կարող են բավական վտանգավոր ակնային հիվանդությունների մասին վկայել, եւ այդ ախտանիշների առկայության դեպքում նույնպես հարկավոր է բժշկի դիմել:

Այն մասին, թե որ դեպքերում է հարկավոր ակնաբույժի դիմել, լրագրողներին պատմել է բժիշկ-ակնաբույժ Լուսինե Բեկիրսկա-Թամազյանը:

Երկտեսություն 

 Մասնագետի խոսքով, եթե կա երկտեսություն, դա արդեն բժշկի դիմելու լուրջ պատճառ է:

Գլխացավեր

Գլխացավերը նույնպես կարող են աչքի տարբեր հիվանդությունների մասին վկայել, եւ եթե դրանք մշտական բնույթ ունեն, թերապեւտից բացի արժե նաեւ ակնաբույժի դիմել: Նույնը վերաբերում է ցավերին քունքային հատվածում:

Չորություն եւ դիսկոմֆորտ՝ աչքերում

Իհարկե, առողջ աչքերն էլ երբեմն կարող են չորության խնդրին բախվել, բայց չորությունը կարող է նաեւ բավական վտանգավոր հիվանդությունների, մասնավորապես՝ գլաուկոմայի ախտանիշ լինել: Նման խնդիրները հերքելու համար նույնպես արժե ակնաբույժի դիմել:

Գույնզգույն արտացոլանքներ

Ինչպես բժիշկ-ակնաբույժ Լուսինե Բեկիրսկա-Թամազյանն է նշել, եթե լուսարձակին նայելիս պացիենտը տեսնում է տարբեր գույների՝ ծիածանանման արտացոլանքներ, դա նույնպես մասնագետի դիմելու լուրջ պատճառ է (երբ բժշկուհին պատմում էր այս մասին, բոլոր ներկաները նայեցին առասաղի լամպերին):

Սեւացում

Եթե աչքերի առաջ միանգամից սեւանում է, իսկ հետո, ժամանակի ընթացքում, տեսողությունը վերականգնվում է, դա նույնպես պատճառ է՝ ակնաբույժի դիմելու համար: