ՀՀ առողջապահության նախարար Արմեն Մուրադյանը մեկնել է Հռոմ մասնակցելու աշխարհի տարբեր երկրներում մանկական ամոքիչ (պալիատիվ) օգնության զարգացման ժամանակակից հիմնահարցերին նվիրված  2-րդ Եվրոպական եռօրյա համաժողովին:

Միջոցառումը կազմակերպվել է ՀՀ առողջապահության նախարարության միջազգային գործընկերներ «Բաց հասարակության հիմնադրամներ» կազմակերպության ջանքերով:

Համաժողովին մասնակցում են աշխարհի բազմաթիվ երկրների առողջապահության բարձրաստիճան հեղինակավոր կազմակերպիչներ, մասնագետներ:

ՀՀ առողջապահության նախարարությունը խիստ կարեւորում է ամոքիչ խնամքի դերը, ուշադրության կենտրոնում պահում, ծանր, անբուժելի հիվանդություններով տառապող կամ անդամալույծ հիվանդների խնամքն իրականացնող ծառայության զարգացմանն ուղղված քայլերը: Այս հիվանդներն առավել քան կարիք ունեն արհեստավարժ բուժօգնության եւ հոգածության:

Այս միջոցառումը հնարավորություն է ընձեռում ծանոթանալու միջազգային փորձին, ուսումնասիրելու բուժօգնության այս տեսակի կազմակերպման նրբությունները եւ ժամանակակից միտումները տարբեր երկրներում, որոնք հետագայում հնարավոր կլինի քննարկել` Հայաստանում կառավարման արդյունավետ մեխանիզմ ներդնելու նպատակով:

Համաժողովի շրջանակում քննարկվելու են նաեւ այս ոլորտում շարունակական կրթական ծրագրերի մշակման հարցերը: