Նոր տարվա սկիզբը լավ նորություններ բերեց քաղցկեղի վերաբերյալ՝ այդ հիվանդությունից մահացության ցուցանիշները շարունակում են նվազել:

«1991 թվականից 2010ը ընկած ժամանակահատվածում քաղցկեղից մահացությունը նվազել է 20%-ով, ինչը կազմում է 1,3 միլիոն մարդ այդ ժամանակահատվածի ընթացքում»,- ասել է FoxNews.com-ին առաջատար հեղինակ Ամերիկյան Ուռուցքաբանական միության (ԱՈւՄ) բժշկական ծառայությունների հետազոտման եւ վերահսկման փոխնախագահ Ահմեդին Ջեմալը: 

«Բայց ամենահետաքրքիր բացահայտումն այն էր, որ մահացության ցուցանիշի նվազումը հատկապես զգալի էր միջին տարիքի սեւամորթ տղամարդկանց մոտ: 1991 –ից  2010 թվականներն ընկած ժամանակահատվածում միջին տարիքի սեւամորթ տղամարդկանց  մահացությունը նվազել է 55 %-ով»:

Ջեմալն այս բարելավումները բացատրում է  վերջին տարիներին տեղի ունեցող բժշկական եւ վարքագծային փոփոխություններով:

«Նվազումը տեղի է ունեցել հիմնականում հիվանդության կանխարգելման եւ վաղ ախտորոշման շնորհիվ, - ասել է Ջեմալը, - Նաեւ շնորհիվ այն բանի, որ մարդիկ սկսել են 50% -ով ավելի քիչ ծխել վերջին տասնամյակների ընթացքում»:

Այնուամենայնիվ Ջեմալը նշեց, որ  դեռ երկար ճանապարհ է սպասվում: Թեպետ ծխելու ցուցանիշները նվազել են, թոքի քաղցկեղը շարունակում է մնալ այս հիվանդության ամենամահացու տեսակներից մեկը: Թոքի, հաստ աղու, շագանակագեղձի եւ կրծքագեղձի քաղցկեղը ամենատարածված մահվան պատճառներն են այս հիվանդության շարքում: Թոքի քաղցկեղը ամեն չորրորդ մահվան պատճառն է։

«Այո, մենք հաջողություններ ունենք, բայց դեռ կա հասուն բնակչության 20%-ը , ովքեր ծխում են եւ ճարպակալումով տառապող հասուն բնակչության ավելի քան մեկ երրորդը, իսկ  2/3-ը մարմնի հավելյալ զանգված ունեն, - ասաց Ջեմալը: - Մենք գիտենք, որ  դրանք քաղցկեղի զարգացման հիմնական ռիսկի գործոններն են: Մարդիկ պետք է թողեն ծխելը եւ  մարմնի առողջ քաշ պահպանեն եւ առողջ սնունդ ուտեն:  Դա իրոք այն է, ինչ մենք պետք է անենք»: