ՀՀ առողջապահության նախարարությունում հրավիրված հերթական նիստի ժամանակ Ռադիոիզոտոպների արտադրության եւ մոլեկուլյար ախտորոշման կենտրոնի խորհրդի նախագահ է ընտրվել ՀՀ առողջապահության նախարարի տեղակալ Գագիկ Միրիջանյանը, իսկ խորհրդի քարտուղար`   ՀՀ առողջապահության նախարարության բժշկական օգնության քաղաքականության վարչության պետ Ծաղիկ Վարդանյանը:  Հիշեցնենք, որ մի քանի օր առաջ ՀՀ առողջապահության նախարար Արմեն Մուրադյանը  հանձնարարել էր ձեւավորել կենտրոնի նոր խորհուրդ, որի  կազմում ընդգրկվել են ՀՀ առողջապահության նախարարության, շահագրգիռ գերատեսչությունների, ինչպես նաեւ շինարարական ընկերության ներկայացուցիչներ: Նիստին ներկա էին խորհրդի 10 անդամներից 7-ը:

Ռադիոիզոտոպների արտադրության եւ մոլեկուլյար ախտորոշման կենտրոնի տնօրենի ժամանակավոր պաշտոնակատար Գեւորգ Յաղջյանը ներկայացրել է Ուռուցքաբանության գերազանցության հայկական կենտրոնի ստեղծման երկարաժամկետ ծրագիրը, որը 2014 թվականի դեկտեմբերին ՀՀ կառավարության որոշմամբ հանձնվել է ՀՀ առողջապահության նախարարությանը։

Ծրագրի առաջին փուլում իրականացվում է Ռադիոիզոտոպների արտադրության եւ մոլեկուլյար ախտորոշման կենտրոնի կառուցումը։

Նիստի ընթացքում  ներկայացվել է աշխատանքային պլանը, տրվել են հանձնարարականներ, ինչպես նաեւ մշակվել են առաջիկա անելիքները: