Ուռուցքաբանության գերազանցության հայկական կենտրոնի տարածքում տեղակայված Ռադիոիզոտոպների արտադրության կենտրոնի շինարարական աշխատանքներն ավարտական փուլում են: 

Այսօր կենտրոնում  IBA Molecular ընկերության արտադրության «ՑԻԿԼՈՆ 18/18» ցիկլոտրոնային արագացուցչի տեղադրմանը  ներկա էր  ՀՀ առողջապահության նախարար Արմեն Մուրադյանը: Նա  ծանոթացավ կատարված շինարարական աշխատանքներին, զրուցեց շինարարների հետ:

Ուռուցքաբանության գերազանցության հայկական կենտրոնի ստեղծման երկարաժամկետ ծրագիրն իրականացվում է երեք փուլով:  Առաջին փուլում նախատեսված է` ռադիոիզոտոպների արտադրության եւ մոլեկուլյար ախտորոշման կենտրոնի ստեղծում: Երկրորդ փուլում` արտահիվանդանոցային ծառայություններ մատուցող ճառագայթային բուժման կենտրոնի ստեղծում, իսկ երրորդում`   մասնավոր ներդրողի առկայության դեպքում նախատեսվում է մեկնարկել  քիմիաթերապիայի եւ վիրաբուժական կենտրոնի ստեղծում՝ ներ եւ արտահիվանդանոցային ծառայություններով:

Ուռուցքաբանության գերազանցության հայկական կենտրոնում կկատարվի ուռուցքաբանական հիվանդությունների կանխարգելում  ու վաղ հայտնաբերում:

Կենտրոնը հագեցված կլինի ռադիոլոգիական եւ ռադիոիզոտոպային ախտորոշման ժամանակակից սարքավորումներով, որոնց միջոցով, ըստ ցուցումների, իրականացվելու են ուռուցքի հայտնաբերման, դրանց տեղակայման եւ ծավալային չափերի, շրջակա հյուսվածքների ախտահարման աստիճանի վերաբերյալ ուսումնասիրություններ:  Ռադիոզոտոպների արտադրության կենտրոնը կունենա ռադիոլոգիական ախտորոշման եւ ռադիոիզոտոպային ախտորոշման, այլ բաժանմունքներ: Նախատեսվում է, որ ուռուցքաբանության ոլորտում  մասնագիտական այս կենտրոնը կսպասարկի ոչ միայն Հայաստանի, այլեւ տարածաշրջանի բնակչությանը: