Ամենամահացու չարորակ նորագոյացություններից  մեկով՝ ենթաստամոքսային գեղձի քաղցկեղով տառապող հիվանդները կարող են ավելի երկար ապրել թերապեւտիկ պատվաստանյութերով բուժումից հետո, պնդում են նոր հետազոտության հեղինակաները:

Հետազոտությանը մասնակցել են 90 հիվանդ, ում բուժել են  համակցված դեղամիջոցներով՝ GVAX Pancreas պատվաստանյութով , իսկ հետո CRS-207 պատվաստանյութով, ինչից հետո հիվանդների կյանքի տեւողությունը երկարել է վեց ամսով , ի տարբերություն  միայն GVAX պատվաստանյութով բուժվողների:  Լավագույն արդյունքները ցույց են տվել GVAX երկու դեղաչափով  եւ նվազագույնը CRS-207 –ի մեկ դեղաչափով բուժված հիվանդները:

Բերկլիի Aduro BioTech ընկերության  գլխավոր տնօրեն Սթիվեն Այզեկսը ենթադրում  է, որ արդյունքը ավելի լավը կլիներ հիվանդության վաղ փուլում գտնվող հիվանդների պատվաստման դեպքում:

Նյու Յորքում Hofstra North Shore-LIJ   բժշկական դպրոցի պրոֆեսոր, բժիշկ Վինսենտ Վինչինգերան ասել է, որ այս մոտեցումն ավելի նպատակային է եւ քիչ թունավոր, քան քիմիոթերապիան, հաղորդում է Newsmax Health-ը։

Կոմբինացված պատվաստում ստացած հիվանդների մեկ քառորդը մեկ տարի անց ողջ էր, ի տարբերություն  12%  հիվանդների, ում բուժել են մեկ պատվաստանյութով: Այզեկսն ասել է, որ հաստատման դեպքում, բուժումը կարժենա  50000  եւ ավելի դոլար:

Դրանից բացի հիվանդները, ովքեր ստացել են պատվաստանյութերի   նվազագույնը երեք դեղաչափ եւ նրանց, ովքեր ստացել են GVAX-ի երկու դեղաչափ եւ CRS-207-ի  գոնե մեկ դեղաչափ, ողջ են մնացել միջինում 9,7  ամիս, ի տարբերություն միայն GVAX ստացած հիվանդների, ովքեր միջինում ապրել  են 4,6 ամիս:

Կոմբինացված պատվաստանյութերի կողմնակի ազդեցությունները հարաբերականորեն չափավոր են եղել եւ չեն սրվել յուրաքանչյուր դեղաչափի հետ, նշել են հետազոտողները: Ամենահաճախ կողմնակի ազդեցություններն են եղել տենդը եւ սարսուռը:

GVAX պատվաստանյութը կազմված է  գենետիկորեն փոփոխված ենթաստամոքսային գեղձի  քաղցկեղի բջիջներից, որոնք խթանում են իմունային համակարգը: Արդյունավետությունը բարձրացնելու համար՝ պատվաստանյութը  ներմուծում են սովորական հակաքաղցկեղային միջոցի՝ ցիկլոֆոսֆամիդի ցածր դոզայի հետ: