նախընտրելի դարձնել
ՀՀ առողջապահության նախարար Արմեն Մուրադյանը հանդիպեց ՀՀ Լոռու մարզի, Երեւանի եւ Ջավախքի 36 կլինիկական օրդինատորների հետ, ովքեր կրթություն են ստանում Երեւանի Մխ. Հերացու անվան պետական բժշկական համալսարանում 21 մասնագիտություններով:
Հանդիպման առանցքում ուսումն ավարտելուց հետո շրջանավարտների մարզեր ուղեգրվելու եւ այնտեղ տեսական գիտելիքները գործնականում կիրառելու պայմաններ ստեղծելու թեման էր:
«Այսօրվա մեր հանդիպումն ավանդական է, քանի որ մենք նպատակ ունենք բոլոր մարզերի ռեզիդենտների եւ կլինիկական օրդինատորների, նրանց հետագա աշխատանքի, մասնագիտացման պայմանների վերաբերյալ շարունակական քննարկումներ ունենալ եւ համատեղ ծրագրեր իրականացնել»,- նշեց ՀՀ առողջապահության նախարար Արմեն Մուրադյանը` ավելացնելով, որ նման հանդիպումները խնդիրներն ու առաջարկներն ամփոփելու, քաղաքականությունը մշակելու, կադրային հարցերը վերհանելու եւ դրանց լուծումները ուրվագծելու լավ հնարավորություն է:
ՀՀ Լոռու մարզպետարանի աշխատակազմի առողջապահության եւ սոցիալական ապահովության վարչության պետը, շնորհակալություն հայտնելով նախարարին հանդիպումը նախաձեռնելու համար:
«Ուզում եմ հավաստիացնել, որ այն ուսանողները, ովքեր կցանկանան իրենց մասնագիտական գործունեությունը շարունակել մեր մարզում, կստեղծվեն անհրաժեշտ բոլոր` այդ թվում բնակարանային, կենցաղային պայմանները»,- ասաց Սամվել Լամբարյանը:
ՀՀ տարածքային կառավարման եւ արտակարգ իրավիճակների նախարարի տեղակալ Դավիթ Կարապետյանն էլ հայտնեց, որ նախարարությունը պատրաստակամ է համատեղ քայլեր իրականացնել եւ բուհն ավարտած մասնագետների համար մարզում աշխատանքը գրավիչ դարձնել:
Խորհրդակցությանը ներկա էին նաեւ Սպիտակի. Տաշիրի, Վանաձորի, Ալավերդու, Ստեփանավանի բժշկական կենտրոնների ղեկավարները, ովքեր պատասխանեցին կլինիկական օրդինատորների հնչեցրած հարցերին, ինչպես նաեւ տեղում հանդես եկան առաջարկներով:
Հանդիպմանը մասնակցում էր նաեւ ՀՀ առողջապահության նախարարության գլխավոր ուրոլոգ, պրոֆեսոր Իվան Աղաջանյանը, ով ի դեպ, մասնագիտական իր ուղին սկսել է հենց Վանաձորից` աշխատելով շտապօգնության ծառայությունում: Ներկայացնելով երիտասարդներին իր փորձը նա շեշտեց, որ մարզում աշխատանքն առաջին հերթին բարձրացնում է պատասխանատվության զգացումը:
Նախարարը արդեն իսկ Վանաձորի բժշկական կենտրոն աշխատելու մեկնած, սրտաբան Կարեն Պողոսյանին առաջարկեց մասնագիտական հմտությունները խորացնելու նպատակով ընդգրկել պետության կողմից 2015թ. բյուջեով առաջին անգամ նախատեսված արտերկրի առաջատար կլինիկաներում վերապատրաստման ծրագրում:
Հանդիպման ընթացքում անդրադարձ կատարվեց մարզային բժշկական կենտրոնները նորագույն սարքավորումներով հագեցման խնդիրին, թիմային աշխատանքին: Կլինիկական օրդինատորները հետաքրքրվեցին մարզերում նոր ծառայություների համալրման, գիտական գործունեությունը կլինիկականի հետ համատեղելու, ինչպես նաև այլ հարցերով: Կարևորվեց նաև բժշկի պաշտպանվածության հարցը` մասնագիտական պատականությունները կատարելիս: Քննարկվեցին նաև հանրային առողջապահական, բժշկական էթիկային վերաբերող մի շարք հարցեր:
Եզրափակելով քննարկումը` ՀՀ առողջապահության նախարարը շնորհակալություն հայտնեց մասնակիցներին անմիջական շփման համար: Նա ընդգծեց երիտասարդների շարունակական բժշկական կրթության զարգացման ուղղված աշխատանքների անհրաժեշտությունը` մաղթելով բազում մասնագիտական հաջողություններ:
