նախընտրելի դարձնել
ՀՀ առողջապահության նախարար Արմեն Մուրադյանն ընդունեց ՀՀ-ում Թուրքմենստանի արտակարգ և լիազոր դեսպան Մուհամեդնիյազ Մաշալովին:
Արտակարգ և լիազոր դեսպանի գնահատմամբ` Հայաստանի եւ Թուրքմենստանի միջեւ համագործակցության հեռանկարային ոլորտ է դեղագործությունը: Արմեն Մուրադյանը տեղեկացրեց, որ հայաստանյան 18 դեղարտադրողներից 2-ն ունի եվրոպական GMP պատշաճ արտադրական գործունեության դեղագործական հավաստագիր, առաջիկայում ևս մեկ ընկերություն կհամալրի նրանց շարքը:
Արմեն Մուրադյանը դեսպանին ներկայացրեց նաեւ առողջապահության համակարգում իրականացվող բարեփոխումները: Նա ընդգծեց, որ Հայաստանում առողջության պահպանման առաջնային օղակի արդիականացումը, ինչպես նաև հանրային առողջապահական ծրագրերի իրականացումը օրակարգային է:
Նախարարի խոսքով` մոր և մանկան առողջության պահպանումը, համակարգում տեղակատվական նորագույն տեխնոլոգիաների ներդրումը գերակա ուղղություն են:
Հանդիպման ընթացքում անդրադարձ կատարվեց նաև հուլիսի 21-ին Աշխաբադում կայանալիք «Առողջություն» պետական ծրագրի 20-րդ տարեդարձին նվիրված բժշկական միջազգային ֆորումին, որին մասնակցելու է նաև ՀՀ առողջապահության նախարարության պատվիրակությունը:
Նշենք, որ Հայաստանի Հանրապետության և Թուրքմենստանի Հանրապետության միջև առողջապահության և բժշկագիտության բնագավառում համագործակցությունը սկսվել է 1996թ․-ից:
