«Անեսթեզիոլոգիան  առողջապահության ամենաբարդ եւ միաժամանակ ամենապահանջված ուղղություններից է, առանց որի չենք կարող պատկերացնել ժամանակակից բժշկությունը:  Անեսթեզիոլոգիայի  զարգացմամբ է առաջին հերթին  պայմանավորված վիրաբուժության մեջ նորարարությունների ներդրումը»: Այս մասին ասել է ՀՀ Առողջապահության նախարար Արմեն Մուրադյանը  Անեսթեզիայի համաշխարհային օրվա առթիվ` ՀՀ անեսթեզիոլոգների եւ ռեանիմատոլոգների ասոցիացիայի հրավիրված նիստին։

Արմեն Մուրադյանն ընդգծել է, որ  օրակարգային է մարզերում որակյալ մասնագետների պակասը լրացնելու խնդիրը:

ՀՀ առողջապահության նախարարի գնահատմամբ` առաջնային  է նաեւ իրավական դաշտի ապահովման,  ոլորտի չափագրման, ինչպես նաեւ ֆինանսավորման արդյունավետ մեխանիզմների ներդրման հարցը:

Առողջապահական համակարգում բարեփոխումների իրականացման, ոլորտի չափագրման, գործելակարգերի եւ ուղեցույցների մշակման գործում  նա մեծապես կարեւորեց մասնագիտական միավորումների աշխատանքը`  հորդորելով վերոնշյալ հարցերի շուրջ ներկայացնել առաջարկներ:

Ընդգծելով, այս կարեւոր ծառայության բարելավումն ու մասնագետներով ապահովվածությունը` Արմեն Մուրադյանը պատրաստակամություն  հայտնեց շարունակական դարձնել նման ձեւաչափի հանդիպումները`   ոլորտի խնդիրներն  համակողմանի քննարկելու եւ կառուցողական լուծումներ գտնելու նպատակով:

Քննարկումը եզրափակվեց անեսթեզիոլոգ- ռեանիմատոլոգ, «Վարդանանց» նորարարական բժշկական կենտրոնի տնօրեն Հարություն Մանգոյանի գրքի շնորհանդեսով, ուր հեղինակն անդրադարձել է ինտենսիվ թերապիային, ծանր  վարակների հակաբակտերիալ բուժմանը, մասնագիտական  շրջանակում լայն հետաքրքրություն ներկայացնող այլ  հարցերի:

Նշենք, որ հոկտեմբերի 16-ին նշվում է Անեսթեզիայի համաշխարհային օրը (World Anaesthesia Day):