Institute of Translational medicine-ի գիտնականները Էնդրյու Ուիքսի գլխավորությամբ, ինչպես նաեւ այլ հետազոտական կազմակերպությունների մասնագետներ   850 000 ֆունտ սթեռլինգի չափով դրամաշնորհ են ստացել հետծննդյան արյունահոսության դեմ պայքարի սարք մշակելու համար: 

Հետծննդյան արյունահոսությունը ծննդաբերությունից հետո առաջին  24 ժամվա ընթացքում ի հայտ եկող բարդացումներից է, որի հետեւանքով կինը կարող է ավելի քան   500-1000 մլ արյուն կորցնել: Այդ բարդացումն աշխարհում մայրական մահացության ամենատարածված պատճառներից մեկն է. աշխարհում ծննդկանների մոտ  25 տոկոսը մահանում է հետծննդյան արյունահոսության հետեւանքով: 

Պրոֆեսոր Էնդրյու Ուիքսն ու իր գործընկերները հատուկ սարք են մշակել, որը  PPH Butterfly անվանումն է ստացել, որը ոչ միայն ի վիճակի է կանգնեցնել հետծննդյան արյունահոսությունը, այլեւ պարզել դրա ի հայտ գալու պատճառը: 

Սարքի նախատիպն արդեն ստեղծվել է եւ մոտ ժամանակներս հետազոտողները նախատեսում են շարունակել հետազոտությունները, ինչպես նաեւ հիվանդների վրա փորձարկել սարքի անվտանգությունը: Հենց այդ փորձարկումների իրականացման համար է տրվել դրամաշնորհը: 

Վերջերս սարքի մշակման համար Ուիքսն ու իր գործընկերները  Հյուսիս-արեւմտյան ափի Առողջապահական գիտական ցանցի Նորարարության մրցանակին էին արժանացել: