նախընտրելի դարձնել
Հայ-իրանական համագործակցությունն առողջապահության ոլորտում սերտացնելու նպատակով Հայաստան է ժամանել Իրանի առողջապահության նախարարի տեղակալ Ռասոուլ Դինարվանդի գլխավորած պատվիրակությունը, որի կազմում են անվանի մասնագետներ, առողջապահության ոլորտի կազմակերպիչներ, մասնավոր հատվածի ներկայացուցիչներ: Հայաստան է ժամանել նաեւ Իրանում ՀՀ դեսպան Արտաշես Թումանյանը: Արմեն Մուրադյանը ողջունելով պատվիրակության անդամներին` նշեց, որ Հայաստանը եւ Իրանը հաջողությամբ համագործակցում են նաեւ միջկառավարական հանձնաժողովի շրջանակում:
«Ուրախ եմ ողջունելու Ձեզ Հայաստանում եւ գոհունակություն եմ հայտնում առողջապահության բնագավառում երկկողմ համագործակցությունը զարգացնելու պատրաստակամության համար: Մոտ երկու ամիս է անցել մեր պատվիրակության Իրան կատարած այցից, որը թույլ տվեց ամրապնդել երկկողմ գործընկերային կապերը եւ կնքել նոր համագործակցության համաձայնագիր՝ գործնական նոր հեռանկարներով»,- ասաց նախարարը` կարեւորելով փոխայցելությունները:
Համաձայնագրի շրջանակում երկու կողմերը ստեղծել են աշխատանքային խմբեր՝ առողջապահության նախարարների տեղակալների մակարդակով:
«Վստահ ենք, որ հայ գործընկերների հետ Ձեր բանակցությունները դրական արդյունք կունենան՝ ի օգուտ մեր ժողովուրդների առողջության»,- ընդգծեց նախարարը:
Ընդհանուր առմամբ, այս տարիների ընթացքում երկու կողմերի միջեւ կազմակերպվել են բազմաթիվ փոխայցելություններ` մասնագիտական փորձի փոխանակման նպատակով, պարբերաբար իրականացվել է հիգիենիկ համաճարակային իրավիճակի մասին տեղեկատվության փոխտրամադրում եւ փոխօգնություն:
«Առիթից օգտվելով շնորհակալություն եմ հայտնում Իրանի Իսլամական Հանրապետության առողջապահության եւ բժշկական կրթության նախարար Հասան Հաշեմիին՝ հանրային առողջապահության խնդիրները համատեղ քննարկելու նպատակով Հայաստանում կայանալիք նախարարական համաժողովին մասնակցելու իմ հրավերն ընդունելու համար»,- ասաց Արմեն Մուրադյանը:
Նա տեղեկացրեց նաեւ, որ օրեր առաջ Մեղրիում բացվել է տարածաշրջանային նշանակության բժշկական նորագույն կենտրոն, որը կարող է գրավիչ լինել նաեւ Իրանի բժշիկների համար:
Համագործակցության ամբողջ ներուժն օգտագործելու նպատակով հատկապես կարեւորվեց հարեւան պետությունների սերտ համագործակցությունը առողջապահության բոլոր ուղղություններով:
Իրանի առողջապահության նախարարի տեղակալի Ռասոուլ Դինարվանդի խոսքով՝ իրենց երկիրը հետաքրքրված է Հայաստանի հետ առողջապահության ոլորտում համագործակցությունն ակտիվացնելու ուղղությամբ:
«Մենք ցանկանում ենք առողջապահության ոլորտում օգտագործել բոլոր հնարավորություններն առավել արդյունավետ համագործակցելու համար»,- ասաց նախարարի տեղակալը:
Նա նշեց, որ իրանական մասնավոր հատվածը հետաքրքրված է մեր երկրում ներդրումներ կատարելու, մասնավորապես` բժշկական կենտրոն ստեղծելու նախաձեռնությամբ:
Որպես համագործակցության լայն հնարավորություն ընձեռող ոլորտ առանձնացվեց նաեւ դեղարտադրությունը: Քննարկվեցին դեղերի արտադրության առաջավոր մեթոդների եւ տեխնոլոգիաների զարգացմանը, ներմուծման եւ արտահանման խթանմանը, փորձի փոխանակմանը վերաբերող հարցեր:
Պատվիրակությունն կայցելի նաեւ ՀՀ մարզեր, ինչպես նաեւ հայաստանյան դեղարտադրող խոշոր կազմակերպություններ:
Հիշեցնենք, որ 2015թ. դեկտեմբերին Թեհրան կատարած այցի շրջանակում ստորագրվել է «Իրանի Իսլամական Հանրապետության առողջապահության եւ բժշկական կրթության նախարարության եւ Հայաստանի Հանրապետության առողջապահության նախարարության միջեւ առողջապահության եւ բժշկագիտության բնագավառում համագործակցության մասին» փոխըմբռնման հուշագիր: Փաստաթուղթը նպաստում է Հայաստանի եւ Իրանի առողջապահության նախարարությունների միջեւ համագործակցության արդյունավետության բարձրացմանը, ինչպես նաեւ բնակչության առողջության բարելավմանը:
