Կոնքային օրգանների բորբոքումը խնդիր է, որի գոյության մասին շատերը չեն էլ լսել, բայց որը կարող է լուրջ հետեւանքների հանգեցնել, օրինակ` կանացի անպտղության, պնդում են Մելբուրնի համալսարանի մասնագետները: 

Փոքր կոնքի օրգանների բորբոքային հիվանդությունների պատճառը կանացի վերաարտադրողական օրգանների` արգանդի, ֆալոպյան փողերի եւ ձվարանների վարակն է: Եթե դրանք չբուժվեն, կարող են ոչ միայն անպտղության հանգեցնել, այլեւ խրոնիկական ցավերի եւ արտաարգանդային հղիության:

Մելբուրնի համալսարանի հետազոտողները պնդում են, թե աշխարհում կանանց մոտ փոքր կոնքի բորբոքային հիվանդությունների մեղմ համաճարակ է դիտարկվում (ՓԿՕԲՀ):  Շատ հաճախ դրա պատճառ են դառնում սեռական եղանակով փոխանցվող հիվանդությունները, ինչպես նաեւ աբորտները եւ ներարգանդային պարույրները: Առավել տարածված բարդացում է համարվում ֆալոպյան փողերի ներսում վիրասպիների առաջացումը, ինչը փողային անպտղության է հանգեցնում: 

Ընդհանուր առմամբ, ՓԿՕԲՀ-ի պատճառով խրոնիկական բարդացումների ռիսկը կախված է նախադեպերի ծանրությունից եւ քանակից: Հիմնական խնդիրն այն է, որ շատ կանայք նույնիսկ չեն ենթադրում, թե իրենք նման խնդիր ունեն: 

Չնայած ՓԿՕԲՀ-ների մեծամասնությունը հնարավոր է հակաբիոտիկներով բուժել, դեղերը չեն կարող հետ շրջել վարակի հետեւանքով արդեն առաջացած գործընթացները: Մյուս կողմից, դեպքերի մեծ մասում նման բորբոքային հիվանդություններով կանայք նորմալ բուժում չեն ստանում. նույնիսկ նորմալ ախտորոշում չեն ստանում: 

ՓԿՕԲՀ-ի ախտորոշման լավագույն միջոցն այս պահին համարվում է լապարոսկոպիկ վիրաբուժությունը: Սակայն դրա արժեքն ու պրոցեդուրայի բարդությունն այն անմատչելի են դարձնում կանանց մեծամասնության համար: 

ՓԿՕԲՀ-ի եւ դրանց հետեւանքով ի հայտ եկող բարդացումների կանխարգելման համար մասնագետները խորհուրդ են տալիս անվտանգ սեքսի եւ պահպանակների օգտագործման վերաբերյալ տեղեկատվություն տարածել: