նախընտրելի դարձնել
Դուք երեւի երեխա ժամանակ վախենո՞ւմ էիք այցելել ատամնաբույժի: Բայց բերանի խոռոչի հիգիենայի, ատամնաբույժի պարբերական այցելությունների եւ նորագույն տեխնոլոգիաների առկայության պայմաններում այսօր Ձեր երեխան չպետք է վախենա դրանից, ասում է ամերիկացի գրող Ջուլի Ռեւելենտը, ով մասնագիտացել է երեխաների դաստիարակության գործում, գրում է Fox News-ը:
Բայց ամեն դեպքում, երեխաները սովորաբար վախենում են այցելել ատամնաբույժի, որովհետեւ չգիտեն՝ ինչ սպասել այցից, ուստի պետք է նրանց նախապատրաստել:
Ըստ Paediatric Dentistry ամսագրում հրապարակված հոդվածի՝ եթե ընտանիքի անդամներից մեկը վախեցել է գնալ ատամնաբույժի, վախը հեշտությամբ փոխանցվել է ընտանիքի մյուս անդամներին:
Եթե Ձեր երեխաները վախենում են գնալ ատամնաբույժի, փորձեք ստորեւ բերված միջոցներից մի քանիսը.
Սկսեք երեխայի բերանի խոռոչը մաքրել փոքր տարիքից
Եթե նույնիսկ Ձեր երեխան դեռ ատամ չունի, պետք է նրա լնդերը մաքրել հատուկ մանկական խոզանակով կամ մատի վրա փաթաթված մաքուր փափուկ կտորով: Այդպիսով երեխան վաղ տարիքում ատամների հետ կապված խնդիրներ չի ունենա, ասում է ամերիկացի կոսմետիկ ատամնաբույժ Բիլլ Դորֆմանը Բեւերլի-Հիլզից:
Երեխային ատամնաբույժի մոտ տարեք մինչեւ նրա մեկ տարին լրանալը
Մանկական ատամնաբուժության ամերիկյան ակադեմիան խորհուրդ է տալիս առաջին անգամ ատամնաբույժի այցելել, երբ երեխայի առաջին ատամներն են աճում կամ երբ նա մեկ տարեկան է: Վաղ տարիքում ատամնաբույժի այցելությունները երեխային կսովորեցնեն չվախենալ նրանցից եւ հետագայում կօգնեն կանխել ատամների հետ կապված խնդիրներն ու ատամնաբույժների նկատմամաբ վախը:
Խոսեք երեխայի հետ
Երեխայի հետ ատամնաբույժների մասին գիրք կարդացեք, բացատրեք, թե ինչ կանի ատամնաբույժը, դրական դեպք պատմեք Ձեր կյանքից:
Երեխայի հետ տանը փորձ կատարեք
Երեխային նստեցրեք բազկաթոռին կամ բազմոցին եւ ձեւացրեք, թե զննում եք նրա ատամները, որպեսզի նա իմանա՝ ինչպես իրեն պահի բժշկի մոտ:
Դա խաղի վերածեք
Ձեզ հետ վերցրեք երեխայի սիրելի գիրքը կամ խաղալիքը, որպեսզի նա իրեն ավելի հարմար զգա:
Դրականորեն տրամադրվեք
Անկախ այն բանից, թե ատամնաբույժի հետ կապված ինչպիսի անձնական փորձ ունեք՝ աշխատեք դրականորեն տրամադրվել, որպեսզի երեխային չվախեցնեք: Երեխայի ներկայությամբ ցավի եւ անհարմարության մասին մի խոսեք, ընդհակառակը՝ պատմեք նրան, թե ինչ առողջ ատամներ կունենա:
Ատամնաբույժի մոտ գնացեք նշանակված ժամից շուտ
DentalVibe Injection համակարգի հեղինակ բժիշկ Սթիվեն Գոլդբերգը խորհուրդ է տալիս կլինիկա գնալ նշանակված ժամից շուտ, որպեսզի երեխան ամեն ինչ սեփական աչքով տեսնի, խոսի աշխատակիցների հետ եւ համոզվի, որ վախենալու ոչինչ չկա:
Մանկական ատամնաբույժները հատուկ պատրաստվում են փոքր երեխաների հետ աշխատելու համար, նրանց գործիքներն ավելի փոքր են, իսկ կլինիկաները զարդարված են վառ նկարներով, այնտեղ խաղալիքներ կան:
