նախընտրելի դարձնել
Հակամանրէային սպիտակուցը կարող է ենթաստամոքսային գեղձի բջիջներին օգնել նորից ինսուլին արտադրել: Կանադացի գիտնականները Ֆրեյզեր Սքոթի գլխավորությամբ (Fraser Scott) կարծում են, որ հակամանրէային կատելիցիդին պեպտիդը կարող է օգտագործվել դիաբետի բուժման մեջ:
Հեղինակները պարզել են, որ եւ ինսուլինը, եւ կատելիցիդինը արտադրվում են ենթաստամոքսային գեղձի բետա-բջիջների կողմից: Հակամանրէային պեպտիդները օրգանիզմում սինթեզվում են մանրէների դեմ պայքարելու համար: Սակայն ենթաստամոքսային գեղձում կատելիցիդինը այլ գործառույթներ է իրականացնում, այն անհրաժեշտ է ինսուլին արտադրելու համար:
Հետազոտությունները ցույց էին տալիս, որ դիաբետով տառապող առնետների մոտ կատելիցիդինի մակարդակը նվազած է: Պեպտիդի ներարկումները հանգեցնում էին ենթաստամոքսային գեղձի բջիջների վերականգնման եւ կենդանիների առողջական վիճակի բարելավման: Բացի այդ, պեպտիդի ներմուծումն աղիքային միկրոբիոմի բաղադրության մեջ փոփոխություններ էր առաջացնում` ազդելով դիաբետի հետ կապված մանրէների քանակության վրա:
Հետազոտողները նախատեսել են շարունակել փորձարկումը: Նրանք հույս ունեն, որ իրենց կհաջողվի դիաբետի 1 եւ 2 տեսակների դեմ պայքարի նոր մարտավարություն մշակել:
