նախընտրելի դարձնել
Արգենտինայում այս տարվա սկզբից դենգե տենդով հիվանդացման մոտ 15 հազար դեպք է արձանագրվել: Այդ մասին տեղեկացնում է առողջապահության նախարար Խորխե Լեմուսը:
«Այս պահին տեղեկություններ կան Արգենտինայում դենգեի 15 հազար դեպքի մասին, դրանց 10 տոկոսն առայժմ չի հաստատվել», - նշել է գերատեսչության ղեկավարը: Լեմուսի խոսքով, սա տենդի ամենալայնածավալ համաճարակն է 2009-ից ի վեր, երբ 30 հազար մարդ էր հիվանդացել դենգեով:
Ներկա պահին դենգեն տարածվել է Արգենտինայի 23 նահանգից 15-ի տարածքում: Առայժմ մահացու դեպքեր չեն գրանցվել, տեղեկացնում է ՏԱՍՍ-ը:
Դենգե տենդը վիրուսային վարակ է, որը գերակշռում է արեւադարձային եւ մերձարեւադարձային շրջաններում: Դրա ախտանիշներն են բարձր ջերմաստիճանը, սրտխառնոցը, ցանը, գլխացավը եւ գոտկատեղի ցավերը: Տենդի արյունահոսային տարբերակն ուղեկցվում է ներքին ուժեղ արյունահոսություններով: Դենգեի փոխանցողները Aedes aegypti տեսակի մոծակներն են, որոնք կարող են նաեւ Զիկա եւ չիկունգունյա վիրուսների տարածողներ լինել:
