Դեղերի եւ բժշկական տեխնոլոգիաների փորձագիտական կենտրոնի ղեկավարների, նախարարության համապատասխան ստորաբաժանումների ղեկավարների մասնակցությամբ ՀՀ առողջապահության նախարար Արմեն Մուրադյանի մոտ քննարկվեցին դեղերի կողմնակի ազդեցությունների մշտադիտարկման համակարգի ուժեղացմանն առնչվող հարցեր։

Կարեւորվեց հատկապես կենտրոնացված գնումներով ձեռք բերվող դեղմիջոցների կիրառման ժամանակ հիվանդների վարման ընթացքում կողմնակի ազդեցությունների քարտերի վարումը։

Նախարարը հանձնարարեց շրջաբերական ուղարկել բուժհաստատություններին, որպեսզի բոլոր կողմնակի ազդեցությունների վերաբերյալ ժամանակին եւ հաստատված ձեւի համաձայն տեղեկացնեն Դեղերի եւ բժշկական տեխնոլոգիաների փորձագիտական կենտրոնին։ Միաժամանակ հանձնարարեց Դեղերի փորձագիտական կենտրոնում կլինիկաների մասնագետների մասնակցությամբ ձեւավորել խումբ` հավաքագրված տեղեկատվությունը հանգամանալից վերլուծելու նպատակով։

Արմեն Մուրադյանն անդրադարձավ նաեւ փորձագիտական կենտրոնում ձեւավորված դեղատնտեսագիտական բաժնի աշխատանքների ակտիվացման խնդրին։ Հանձնարարեց դեղերի որակը եւ արդյունավետությունը գնահատելիս առաջնորդվել նաեւ դեղատնտեսագիտական մշակված մեթոդաբանությամբ։

«Պետք է ձգտենք, որ գոնե սոցիալական հիվանդությունների բուժման նպատակով կենտրոնացված գնումներով ձեռք բերվող դեղերը գրանցելիս ունենանք դրանց դեղատնտեսագիտական վերլուծությունը` արտարդվող կամ այլ երկրում իրականացված մեկ տարվա դիտարկման արդյունքներով»,-ասաց նախարարը` կարեւորելով նաեւ հետգրանցումային շրջանում դեղերի կողմնակի ազդեցությունների մշտադիտարկման համակարգի ուժեղացումը, նոր մոտեցման ձեւավորումը։

Նախարարին զեկուցվեց, որ դեղերի կողմնակի ազդեցությունների գրանցման եւ վերլուծման համակարգն ակտիվացնելու նպատակով կազմակերպվել են բժիշկների երկամսյա դասընթացներ։