նախընտրելի դարձնելՏնային լաբորատոր հետազոտությունները պարտադիր սոցիալական ապահովագրության փաթեթում չեն ներառվում։ Այս մասին այսօր՝ հունվարի 30-ին, խորհրդարանում աշխատանքային քննարկումների ժամանակ հայտնել է առողջապահության նախարար Անահիտ Ավանեսյանը՝ պատասխանելով քննարկումների ընթացքում ընթերցված օգտատիրոջ հարցին։
Մասնավորապես, օգտատերը նշել է, որ հաշմանդամություն ունեցող անձանց տնային հետազոտությունների համար դեռեւս վճար է գանձվում։ Օրինակ՝ առաջին կարգի հաշմանդամություն ունեցող անձի հետազոտությունն արժե 14 հազար դրամ, ընթացակարգն ինքնին տեւում է մոտ 10 րոպե, իսկ նրանց կենսաթոշակը կազմում է ընդամենը 39 հազար դրամ։
Ավանեսյանը պարզաբանել է, որ լաբորատոր հետազոտությունները այժմ ներառված են ապահովագրական փաթեթում, եթե կատարվում են համապատասխան բժշկական հաստատություններում։ Սակայն բժշկական անձնակազմի տնային այցելությունները դեռեւս չեն ներառվում ստանդարտ փաթեթում, քանի որ պահանջում են լրացուցիչ լոգիստիկ ծախսեր։ «Մենք ուսումնասիրում ենք խնդրի լուծման հնարավորությունը, երբ մարդը ֆիզիկապես չի կարողանում դուրս գալ տնից։ Սակայն սա դեռեւս չի ներառվել ստանդարտ փաթեթում»,- նշել է նախարարը։
Իր հերթին, «Քաղաքացիական պայմանագիր» խմբակցության պատգամավոր Զարուհի Բաթոյանը նշել է, որ թեեւ անվճար լաբորատոր հետազոտությունները, անկասկած, դրական զարգացում են, բարձրացված հարցը պետք է օպերատիվ ձեւով լուծվի։ «Դուք ինքներդ նշեցիք, որ տնային այցելությունների համար խմբերը փոքր են։ Ես կարծում եմ, որ խնդիրը լուծելու համար մենք պետք է համագործակցենք կառավարման ողջ համակարգի հետ։ Սա կարող է դուրս գալ առողջապահական համակարգից. օրինակ՝ կարող են ներգրավվել սոցիալական ոլորտը եւ տեղական ինքնակառավարման մարմինները։ Մենք պետք է համատեղ աշխատենք այս մարդկանց օգնելու համար, քանի որ եթե շղթայի մեկ տարրը չի աշխատում, մեր աջակցությունը կարող է պակաս արդյունավետ լինել։ Այս առումով ես նաեւ առաջարկում եմ համագործակցել այլ կառույցների հետ, որպեսզի կարողանանք համապարփակ աջակցություն ցուցաբերել»,- հայտնել է պատգամավորը։
Ավանեսյանը նաեւ անդրադարձել է հաշմանդամություն ունեցող անձանց եւ ծանր հիվանդ բուժառուների բժշկական աջակցության հարցերին: Քննարկման ընթացքում ներկայացվել է երկրորդ կարգի հաշմանդամություն ունեցող քաղցկեղով հիվանդի հարցը: Նա հետաքրքրվել է, թե արդյոք կարող է դեղորայք ստանալ իր ապահովագրական փաթեթի շրջանակում: Նախարարը հաստատել է, որ նման բուժառուները համարվում են ապահովագրված, եւ փաթեթի շրջանակում քիմիաթերապիայի դեղերի տարեկան փոխհատուցումը կազմում է մինչեւ 1.2 միլիոն դրամ: «Բուժառուները կարող են ստուգել, թե որ դեղամիջոցներն են ներառված ապահովագրական փաթեթում եւ ձեռք բերել անհրաժեշտ դեղորայքը»,- պարզաբանել է նա:
