նախընտրելի դարձնելԲժշկական հաստատությունների մասնակցությունը պարտադիր բժշկական ապահովագրության ծրագրին լիովին կամավոր է: Ցանկացած բժշկական կենտրոն, այդ թվում՝ մասնավոր հիվանդանոցներ եւ առաջնային բուժօգնության հաստատություններ, կարող է պայմանագիր չկնքել ապահովագրական հիմնադրամի հետ եւ ծառայություններ մատուցել վճարովի հիմունքներով: Այս մասին այսօր՝ հունվարի 30-ին, խորհրդարանում աշխատանքային քննարկումների ժամանակ հայտնել է առողջապահության նախարար Անահիտ Ավանեսյանը։
«Ոչ մի պարտադիր տարր չկա. ցանկացած բժշկական կենտրոն, այդ թվում՝ մասնավոր առաջնային բուժօգնության հաստատությունները, կարող է պայմանագիր չկնքել ապահովագրական հիմնադրամի հետ եւ ծառայություններ մատուցել վճարովի հիմունքներով»,- հայտնել է նա: Միեւնույն ժամանակ, նախարարը նշել է, որ շուկայում պարտադիր ապահովագրական համակարգի բացակայության դեպքում, երբ բուժառուն ինքն է վճարում ծառայությունների դիմաց, գները որոշվում են բոլորովին այլ տրամաբանությամբ:
«Պետք է նշեմ, որ նախկինում որոշակի ծառայությունների համար սահմանվում էին անհասկանալի գներ, մինչդեռ այժմ մեր ապահովագրական փաթեթում փոխհատուցման դրույքաչափերը սահմանվում են շուկայական գներով։ Բայց մենք նաեւ կարծում ենք, որ մեր մեթոդաբանության համաձայն՝ հիմնավորման բացակայության դեպքում փոխհատուցման դրույքաչափերը պետք է համարվեն օբյեկտիվ։ Նախ՝ մատուցվող ծառայությունների թիվն ավելանում է, երկրորդ՝ դրանք դառնում են ավելի կանխատեսելի. բժշկական կենտրոնները, ներդրումներ կատարելիս, գիտեն, որ կունենան ծառայությունների երաշխավորված մեծ գնորդ՝ մեծ ծավալներով»,- նշել է նա։
Խոսելով այն մասին, թե ինչպես կարող են բժշկական հաստատությունները միանալ համակարգին, նա նշել է, որ ապահովագրական փաթեթի շրջանակում ծառայություններ մատուցել ցանկացող ցանկացած բժշկական հաստատություն պետք է ներկայացնի հիմնադրամի հետ պայմանագրի հայտ։ «Հայտը դիտարկվում է, եւ բոլոր սահմանված կարգավորիչ պայմանների բավարարման դեպքում հիմնադրամի եւ բժշկական կենտրոնի միջեւ կնքվում է պայմանագիր ապահովագրական փաթեթի շրջանակում ծառայությունների մատուցման համար»,- պարզաբանել է Ավանեսյանը։
Նախարարը նշել է, որ հունվարին սկսել են ստացվել նոր հայտեր այն կազմակերպություններից, որոնք մինչ այդ չէին մասնակցել բժշկական ծառայությունների մատուցման պետպատվերին։ «Մենք մանրակրկիտ գնահատում ենք հաստատությունների սարքավորումները, մասնագիտական անձնակազմի առկայությունը եւ բոլոր կարգավորիչ պահանջներին համապատասխանությունը, եւ եթե արդյունքը դրական է, մենք ստորագրում ենք պայմանագիրը»,- նշել է նա։
