Առաջին անգամ գենային թերապիայի միջոցով վերականգնել են երեխայի լսողությունը

Մեծ Բրիտանիայում առաջին անգամ գենային թերապիայի միջոցով վերականգնել են երեխայի լսողությունը։ Խլության բուժման ոլորտում բեկման մասին պատմել է The Guardian-ը։

1,5 տարեկան Օպալ Սենդին բնածին խուլ էր լսողական նեյրոպաթիայի պատճառով, վիճակ, որի դեպքում խանգարվում է նյարդային ազդակի հաղորդումը ներքին ականջից ուղեղին, որը կարող է առաջանալ արատավոր գենի պատճառով։

Օպալը վիրահատական միջոցով գենի աշխատանքային պատճեն է ստացել, միջամտությունը տեւել է ընդամենը 16 րոպե։ Հիմա աղջիկը լսում է, գոհունակությամբ խաղալիք թմբուկ նվագում եւ գդալով հարվածում սեղանին։ Ծնողներն արդյունքը «խելահեղ» են անվանել։

Փորձի գլխավոր հետազոտող, պրոֆեսոր Մանոհար Բանսի խոսքով՝ առաջին արդյունքներն ավելի լավն էին, քան ինքը «սպասում էր եւ ակնկալում», եւ հույս են տալիս խլության այդ տեսակն ունեցող պացիենտներին։

Նշվել է, որ Օպալը ստացել է գենային թերապիայի ցածր չափաբաժին եւ միայն մեկ ականջին։ Երեխաների մի խումբ էլ կստանա բարձր չափաբաժին, բայց կրկին մեկ ականջին։ Եթե պարզվի, որ դա անվտանգ է, այլ երեխաներ կստանան չափաբաժիններ երկու ականջներին միաժամանակ։ Փորձին կմասնակցի ընդամենը 18 երեխա ամբողջ աշխարհից։

Հետազոտությունները կատարվել են տասնամյակների ընթացքում, նշել է Բանսը։ Երեխաների վիճակին վիրահատությունից հետո կհետեւեն հինգ տարի։

Հետևեք NEWS.am Medicine-ին Facebook-ում և Twitter-ում