Շատերը կարծում են, որ պնեւմոնիան՝ թոքերի բորբոքումը, թեթեւ հիվանդություն է եւ վտանգ չի ներկայացնում: Սակայն դա այդպես չէ. աշխարհում տարեկան գրանցվում է 155 միլիոն պնեւմոնիայի դեպք՝ միայն մինչեւ հինգ տարեկան երեխաների շրջանում, 1,4 միլիոն երեխա մահանում է:
Ինչպես ՀՀ ԱՆ գլխավոր թոքաբան Անդրանիկ Ոսկանյանն է նշել, պնեւմոնիան այսօր բժշկության համար լուրջ մարտահրավեր է: ԱՀԿ-ի տվյալներով՝ գրեթե բոլոր հիվանդություններով հիվանդացությունը աշխարհում նվազման միտում ունի, իսկ պնեւմոնիաների թիվն անընդհատ աճում է:
Ինչ վերաբերում է Հայաստանի տվյալներին, վերջին երեք տարիների ընթացքում այստեղ նկատվում է մինչեւ մեկ տարեկան երեխաների շրջանում մահացության նվազում. եթե 2011 թվականին 100 000 հիվանդ երեխաներից 11.6-ն էին մահանում, 2012 թվականին ցուցանիշը դարձավ 10.7, իսկ 2013-ին՝ 9.8: Անդրանիկ Ոսկանյանի խոսքով՝ մոտ ապագայում մահացությունն այս հիվանդությունից էլ ավելի կնվազի, քանի որ այս տարվա սեպտեմբերից երկրում հակապնեւմոկոկկային պատվաստում է արվում, իսկ պնեւմոկոկկային ինֆեկցիան թոքաբորբի հիմնական պատճառներից մեկն է:
Քանի որ պնեւմոնիան սովորաբար բակտերիալ ծագում ունի, դրա բուժման միակ մեթոդը հակաբիոտիկներն են: Սակայն աշխարհում երեխաների միայն 30 տոկոսին է այդ բուժումը հասանելի:
Բացի այդ, լուրջ խնդիր է նաեւ հակաբիոտիկների հանդեպ կայունությունը, որն այսօր ողջ աշխարհում մեծ տարածում է ստացել՝ հակաբիոտիկների սխալ կիրառման հետեւանքով:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր