Նռան հյութն ու արմավը կարող են կանխարգելել կաթվածն ու աթերոսկլերոզը

Կես բաժակ նռան հյութն ու օրական երեք արմավը կարող են 33 տոկոսով նվազեցնել անոթների պատերին լիպիդների կուտակումը՝ այդպիսով կանխարգելելով կաթվածը, նշում են Technion-Israel Institute of Technology-ի գիտնականները:

Ինչպես նշել է հետազոտության առաջատար հեղինակ Մայքլ Ավիրամը, այս մթերքներում հակաօքսիդանտներ են պարունակվում, որոնք կանխարգելում են աթերոսկլերոզի՝ ճարպային կուտակումներով արյունատար անոթների խցանման զարգացումը: Այս մթեքներն ակտիվորեն օգտագործող մարդկանց մոտ աթերոսկլերոզի զարգացումը դանդաղում է 3 անգամ:

Ճարպային կուտակումները անոթներում շատ վտանգավոր են, քանի որ կարող են խցանել անոթները՝ խափանելով դեպի սիրտ արյան հոսքը եւ կաթված առաջացնելով: Իսկ եթե այդ կուտակումների պատճառով դադարում է ուղեղի սնուցումն արյունով, ինսուլտ է առաջանում: Իրենց հետազոտության ընթացքում գիտնականները լաբորատոր պայմաններում հետեւել են արտերիալ բջիջներին, ինչպես նաեւ ուսումնասիրել խոլեստերինի բարձր մակարդակով մկների առողջությունը:

Պարզվել է, որ արմավի ու նռան հյութի համակցությունը իսկապես կարող է ապահովագրել աթերոսկլերոզից: Ընդ որում՝ արմավը խորհուրդ է տրվում օգտագործել հենց կորիզներով, որոնք նախապես պետք է մշակվեն՝ հասցվելով մածուկաձեւ վիճակի: Այս հյութի եւ արմավի համակցությունը կարող է նաեւ նվազեցնել խոլեստերինի պարունակության մակարդակը 28 տոկոսով:

Որոշ գիտնականներ պնդում են, որ նռան մեջ պարունակվող նյութերը կարող են նաեւ կանխարգելել քաղցկեղը կամ դանդաղեցնել դրա զարգացումը:

Հետևեք NEWS.am Medicine-ին Facebook-ում և Twitter-ում