Անհրաժե՞շտ է արդյոք Հայաստանի սահմանին գրիպի պատճառով կարանտին մտցնել

Այս պահի դրությամբ Հայաստանում սուր շնչառական վարակների, գրիպի բոլոր տեսակների եւ թոքաբորբի  855 դեպք է գրանցվել: Դրանց թվում H1N1 գրիպի (որը հայտնի է նաեւ որպես խոզի գրիպ) 170 հաստատված դեպք կա: Պե՞տք է արդյոք այդ կապակցությամբ երկրի սահմաններին կարանտին մտցնել:  Հայաստանի Առողջապահության նախարարության հիվանդությունների վերահսկողության եւ կանխարգելման ազգային կենտրոնի ղեկավար Արտավազդ Վանյանը համարում է, որ այս դեպքում կարանտինի ոչ մի անհրաժեշտություն չկա: 

NEWS.am Medicine-ի թղթակցի հետ զրույցում մասնագետը նշել է, որ Առողջապահության Համաշխարհային Կազմակերպությունը   (ԱՀԿ) հստակ հանձնարարականներ ունի, թե երբ եւ ինչ դեպքերում է անհրաժեշտ կարանտին մտցնել:  Երկրում ներկայիս համաճարակաբանական իրավիճակը չի համապատասխանում այդ հանձնարարականներին, որովհետեւ Հայաստանում այսօրվա դրությամբ գրիպի համաճարակ եւ նույնիսկ բռնկում չկա, միայն սեզոնային սրացում:  

«Աշխարհում չկան այնպիսի երկրներ, որոնցում գրիպի եւ ՍՇՎ-ի պատճառով սահմաններին սահմանափակումներ եւ կարանտին մտցվի», - նշել է Արտավազդ Վանյանը:

Նրա կարծիքով, սահմանների վրա կարանտինի որ միայն անհրաժեշտություն չկա, այլեւ որեւէ իմաստ: Հարցն այն է, որ ՍՇՎ-ն ու գրիպը տարածվում են օդակաթիլային ճանապարհով եւ ինկուբացիոն շրջան ունեն, որի ընթացքում կարող են ոչ մի կերպ չդրսեւորվել: Դա նշանակում է, որ գրիպով վարակված, բայց առայժմ այդ մասին չիմացող մարդն   առանց դժվարության կարող է շրջապատում շատերին վարակել, սակայն սահմանին դա չեն կանգնեցնի, որովհետեւ կարող է լրիվ առողջ տեսք ունենալ: 

Մյուս կողմից, հայկական օդանավակայաններում, ինչպես նշել է Արտավազդ Վանյանը, հատուկ անշփում ջերմաչափեր կան, որոնց միջոցով հնարավոր է հայտնաբերել բարձր ջերմություն ունեցող մարդկանց: Եթե մասնագետներն օդանավակայանում նման ուղեւորներ հայտնաբերեն, նրանց կմեկուսացնեն եւ անհրաժեշտ բուժօգնություն կցուցաբերեն: 

Այսօրվա դրությամբ գրիպն ու ՍՇՎ-ներն ակտիվ են աշխարհի բոլոր երկրներում, նշել է Արտավազդ Վանյանը, եւ Հայաստանում դրանք հազիվ թե արժանի են այն ամբողջ ուշադրության, որն այսօր տրամադրվում է նրանց. ի վերջո անցյալ տարվա մարտին հիվանդացությունն անհամեմատ ավելի բարձր էր, սակայն դրա շուրջ նման աժիոտաժ չկար: 

Մասնագետները հայերին կոչ են անում զգույշ լինել, չմրսել, հաճախ օդափոխել սենյակները եւ հետեւել անձնական հիգիենային գրիպով եւ ՍՇՎ-ով վարակվելուց խուսափելու համար: Իսկ եթե ձեզ մոտ գրիպի կամ ՍՇՎ-ի ախտանիշներ են ի հայտ եկել, դիմեք ձեր բնակության վայրի պոլիկլինիկա` ձեր ընտանեկան բժշկին կամ թերապեւտին, որպեսզի խորհուրդներ, բուժում ստանաք, ինչպես նաեւ որոշ դեղամիջոցներ, որոնցով այս սեզոնում ապահովել են հիվանդանոցներին եւ պոլիկլինիկաներին:

Հետևեք NEWS.am Medicine-ին Facebook-ում և Twitter-ում