Երևանի փողոցներում արդեն այսօր կարելի է բազմաթիվ երիտասարդների տեսնել բժշկական դիմակներով, որոնք նրանց կարծիքով, պետք է իրենց պաշտպանեն գրիպից: Սակայն, արժե արդյո՞ք դիմակ հագնել փողոցում:
Ինչպես NEWS.am Medicine-ի թղթակցի հետ զրույցում նշել է ՀՀ Առողջապահության նախարարության հիվանդությունների վերահսկողության և կանխարգելման ազգային կենտրոնի շնչառական ինֆեկցիաների հատուկ վտանգավոր ինֆեկցիոն հիվանդությունների համաճարակաբանության բաժնի ղեկավար Լիանա Թորոսյանը՝ փողոցում դիմակներ հագնելն անիմաստ է ու նույնիսկ անհեթեթ:
«Եթե փողոցում դիմակ հագնելն իմաստ ունենար, այդ դեպքում ինչո՞ւ էինք մենք խորհուրդ տալիս հաճախ օդափոխել բնակարանները», - հարցրեց մասնագետը:
Բժշկական դիմակներ խորհուրդ են տալիս հագնել փակ տարածություններում , մանավանդ եթե այնտեղ հիվանդ մարդիկ կան: Գրիպը փոխանցվում է օդակաթիլային ճանապարհով. եթե հիվանդը հազում է կամ փռշտում ( ընդ որում չի պահպանում հազալու ու փռշտալու էթիկան) հիվանդության հարուցիչները հայտնվում են օդում, որտեղից էլ դրանք կարող են շնչառական համակարգի ու լորձաթաղանթի միջոցով հայտնվել առողջ մարդկանց օրգանիզմում:
Նույնիսկ եթե հիվանդը հազա փողոցում, վիրուսների խտությունը մաքուր օդում բավարար չի լինի մյուսներին վարակելու համար: Իսկ ահա փակ տարածքում, մանավանդ եթե այն չի օդափոխվում, կարող է վիրուսների վտանգավոր քանակություն կուտակվել, այնպես որ փակ տարածքում վարակվելը բավականին հեշտ է, ու այդ պատճառով էլ մասնագետները խորհուրդ են տալիս դիմակ հագնել հենց փակ տարածքներում: Եվ հնարավորինս հաճախ օդափոխել սենյակները:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր