ԴԱՆ միության ղեկավարը ՀՀ ԱՆ՝ խոզի գրիպի հետ կապված գործողություններն ուշացած է համարում

Հայաստանի Դեղ արտադրողների եւ ներմուծողների միության (ԴԱՆ) ղեկավար  Սամվել Զաքարյանը Հայաստանի Առողջապահության նախարարության` գրիպի տարածումը կանխարգելելու գործողությունները տվյալ սեզոնին ուշացած է համարում: Հունվարի 19-ին լրագրողների հետ զրույցում նա ասել է, որ պետք էր անհամեմատ ավելի վաղ գործել, դեռեւս մինչեւ Նոր տարի, երբ երկրում խոզի գրիպից մահացության առաջին դեպքերն էին գրանցվել:

Սամվել Զաքարյանը նշել է, որ նույնիսկ եթե թվերի համաձայն համաճարակ գոյություն չունի, այնուամենայնիվ, անհրաժեշտ էր մարդկանց ժամանակին զգուշացնել վտանգի մասին, բացատրել, թե ինչպես է պետք գործել չվարակվելու համար: «Նոր տարուց հետո հիուշաթերթիկներ են հայտնվել այն մասին, թե ինչպես պետք է վարվել հիվանդության նախանշանների դեպքում», - նշել է նա` հավելելով, որ հաճախ կարելի է լսել, թե շրջաններում եւ գյուղերում մարդիկ միեւնույն է` ականջալուր չեն լինում կոչերին, կամ էլ տեղեկությունները նրանց չեն հասնում: «Ուրեմն պետք է այնպես անել, որ հասնեն», - ասել է Զաքարյանը:

Նրա կարծիքով, պետք է կապի բոլոր միջոցների` հեռուստատեսության, էլեկտրոնային լրատվամիջոցների, ռադիոյի, բջջային հաղորդագրությունների օգնությամբ տեղեկացման Alert համակարգ գործարկվի: Օրինակ` Գյուղատնտեսության նախարարությունը բջջային հաղորդագրությունների միջոցով գյուղի բնակիչներին տեղեկացնում է առաջիկա ցրտերի մասին:  Սամվել Զաքարյանի կարծիքով, նման համակարգ կարող էր օգտագործել Առողջապահության նախարարությունը: Եվ դա պետք էր անել դեռեւս այն ժամանակ, երբ երկրում ի հայտ էին եկել առաջին հիվանդները:  

Ինչ վերաբերում է նրան, որ իշխանությունները փորձում էին խուճապից խուսափել, Սամվել Զաքարյանը նշել է, որ խուճապը սկսվում է այն ժամանակ, երբ պնդում են, թե համաճարակ չկա, բայց երկրում արդեն  16-րդ հիվանդն է մահացել: «Բայց միաժամանակ հիվանդն ինքն էր մեղավոր, որովհետեւ միայն տասներորդ օրն էր դիմել բժշկի: Սակայն նա մեղավոր չէ, որովհետեւ նրան չէին ասել, թե խոզի գրիպ գոյություն ունի եւ պետք է պաշտպանվել», - հավելել է Սամվել Զաքարյանը:

Հետևեք NEWS.am Medicine-ին Facebook-ում և Twitter-ում