Դիետիկ գազավորված ըմպելիքները սովորականներից ավելի քիչ կալորիա են պարունակում, բայց դրանք նույնքան վնասակար են առողջության համար եւ նույն չափով մեծացնում են ճարպակալման եւ սրտի հիվանդությունների առաջացման վտանգը: Այս մասին զգուշացրել են Purdue University-ի մասնագետները:
Շատերն արհեստականորեն քաղցրացված ըմպելիքներ են օգտագործում՝ կարծելով, որ եթե դրանք ավելի քիչ շաքար եւ կալորիաներ են պարունակում, ուրեմն ավելի լավն են ու անվտանգ: Սակայն գիտնականների հնգամյա հետազոտության արդյունքում պարզվել է, որ դիետիկ գազավորված ըմպելիքները նույնպես հանգեցնում են ճարպակալման: Ավելին, եթե անգամ նման ըմպելիքների սիրահարները չեն գիրանում, նրանց մոտ, ամեն դեպքում, մեծ է դիաբետի եւ սրտի հիվանդությունների, ինչպես նաեւ ուղեղի կաթվածի վտանգը:
«Անկեղծ ասած՝ ես կարծում էի, որ դիետիկ գազավորված ըմպելիքները զգալիորեն օգտակար են առողջության համար՝ ի տարբերություն սովորականների: Բայց իրականում դրանց արդյունքը բացարձակ նույնն է»,- ասել է հետազոտության հեղինակ, պրոֆեսոր Սյուզան Սվիզերսը:
Երբ դիետիկ գազավորված ըմպելիքների սիրահարներն իսկական շաքար են օգտագործում, օրգանիզմը չի հասկանում՝ ինչպես արձագանքել, քանի որ սովոր է առանց շաքարի քաղցր մթերք օգտագործել: Մեծ քանակությամբ նման գազավորված ըմպելիքներ օգտագործելուց հետո քաղցրահամ մթերքները բնական հորմոն չի արտադրում՝ արյան մեջ շաքարի մակարդակը կարգավորելու համար: Իսկ դա նշանակում է, որ այդ ցուցանիշը նվազում է՝ քաղց եւ քաղցրի պահանջ առաջացնելով:
Հետևեք NEWS.am Medicine-ին Facebook-ում և Twitter-ում