Արհեստական քաղցրացուցիչներով գազավորված ըմպելիքների օգտագործումը կարող է կանանց խանգարել հղիանալ: Նման նախազգուշացմամբ են հանդես եկել բրազիլական Սան Պաուլոյի համալսարանի հետազոտողները:
524 կնոջ մասնակցությամբ անցկացված հետազոտության ընթացքում կապ է բացահայտվել արհեստական քաղցրացուցիչների եւ պտղաբերության ցածր գործակցի միջեւ: Գազավորված ըմպելիքներում եւ սուրճում առկա քաղցրացուցիչների օգտագործումը կապված է ձվաբջիջների եւ էմբրիոնների ցածր որակի հետ: Կարծիք կա նաեւ, որ հաջող հղիության հավանականության նվազման պատճառ կարող են դառնալ ոչ միայն քաղցրացուցիչները, այլեւ դրանց հետեւանքով ճարպակալումը:
Արհեստական քաղցրացուցիչները քիմիական նյութեր են, որոնք շատերը նախընտրում են՝ դրանց ցածր կալորիականության պատճառով: Անպտղության բուժման կենտրոնում անցկացված հետազոտության ընթացքում կանայք պատասխանել են օգտագործած սննդի եւ ըմպելիքի մասին հարցերի:
Հարցման արդյունքները հղիության գործակցի նվազման եւ արհեստական քաղցրացուցիչներ պարունակող ըմպելիքի օգտագործման միջեւ հստակ կապ են հայտնաբերել: Հետազոտությունը նաեւ ցույց է տվել, որ դառը սուրճը ոչ մի ազդեցություն չի ունենում ձվաբջիջների որակի կամ հղիության հավանականության վրա:
Հետևեք NEWS.am Medicine-ին Facebook-ում և Twitter-ում