Սնունդը մանրակրկիտ ծամելու դեպքում կարող է նվազել մետաբոլիկ սինդրոմի առաջացման վտանգը: Այս մասին հաղորդել են ճապոնական Նիիգատայի համալսարանի (Niigata University) գիտնականները:
Հետազոտության ընթացքում նրանք գնահատել են 50-70 տարեկան 1780 մարդու ծամելու ունակությունը: Փորձի մասնակիցներին 4 խմբի են բաժանել՝ կախված նրանց ծամելու ունակությունից: Առաջին խմբում ներառվել են նրանք, ովքեր մանրակրկիտ ծամում են ուտելիքը, իսկ չորրորդ խմբի անդամները դա այնքան էլ լավ չեն արել: Պարզվել է, որ չորրորդ խմբի մարդիկ մյուսներից ավելի հաճախ են տառապել մետաբոլիկ սինդրոմով: 70 տարեկան մասնակիցների շրջանում դրա զարգացման հավանականությունը 1.9 անգամ ավելին է եղել:
Մետաբոլիկ սինդրոմը նյութափոխանակության խանգարումների համալիր է, որոնց զարգացումը մեծացնում է սիրտ-անոթային հիվանդությունների եւ 2-րդ տիպի դիաբետի առաջացման վտանգը: Նման սինդրոմով մարդկանց մոտ մեծանում է օրգանիզմում ճարպերի քանակության ավելացումը, հատկապես՝ որովայնի շրջանում, հիպերինսուլինեմիա առաջանում: Այս սինդրոմի առաջացման հիմնական պատճառը համարում են ֆիզիկական ակտիվության նվազումն ու սխալ սննդակարգը: Դեր ունի նաեւ ժառանգական բաղադրիչը:
Հետազոտության հեղինակները կարծում են, որ հասուն տարիքում սնունդը մանրակրկիտ ծամելու ունակության նվազումը կարող է կապված լինել ատամների առողջության վատացման հետ: Ըստ գիտնականների՝ չի բացառվում, որ ժամանակին ատամնաբույժի դիմելու եւ ատամների առողջությունը պահպանելու դեպքում հնարավոր է մի քանի անգամ նվազեցնել ծերության տարիներին մետաբոլիկ սինդրոմի առաջացման վտանգը:
Հետևեք NEWS.am Medicine-ին Facebook-ում և Twitter-ում