Սննդի մեջ օրական առնվազն մեկ ձու օգտագործող երեխաները զգալիորեն փոքր հավանականությամբ են ցածրահասակ լինում ավելի մեծ տարիքում: Նման եզրակացության է հանգել Սենթ Լուիսի Վաշինգտոնի համալսարանը ներկայացնող հետազոտողների խումբը:
Մասնագետները կես տարի հետեւել են 160 երեխաների, որոնցից յուրաքանչյուրի տարիքը հետազոտությունը սկսելու պահին 6-ից մինչեւ 9 ամսական է եղել: Պարզվել է, որ հետազոտության այն մասնակիցների շրջանում, որոնք պարբերաբար ձու են կերել, հասակի հետ կապված խնդիրները 47 տոկոսով (գրեթե 2 անգամ) ավելի հազվադեպ են դիտվել, քան մյուսների շրջանում: Երեխաները նաեւ 74 տոկոսով ավելի հազվադեպ են տառապել անբավարար քաշից, չնայած ավելի քիչ են օգտագործել քաղցրացված ըմպելիքներ, քան մյուս երեխաները:
Գիտնականները նշում են, որ նախկինում որոշ մասնագետների արդեն հաջողվել էր մարդու հասակի եւ մանկության տարիներին բավարար քանակով ձու ուտելու միջեւ կապի վկայություններ հայտնաբերել: Սակայն նոր հետազոտությամբ, նրա հեղինակների խոսքով, պարզվել է, որ այս փոխկապն ավելի նկատելի է, քան մինչեւ հիմա կարծում էին:
Ստացված արդյունքները ներկայացվել են Pediatrics ամսագրում:
Նախկինում կատարված մեկ այլ հետազոտության ընթացքում Լոնդոնի Կայսերական քոլեջի մասնագետները եզրակացրել են, որ 4-ից մինչեւ 6 ամսականում առաջին անգամ հավկիթ համտեսած երեխաները հետագայում զգալիորեն պակաս հավանականությամբ են ձվի նկատմամբ ալերգիայով տառապում:
Հետևեք NEWS.am Medicine-ին Facebook-ում և Twitter-ում