Մարդու կյանքի տեւողությունը սահման ունի եւ կախված չէ սնվելու որակից, բժշկության մակարդակից եւ կենցաղային պայմաններից, պարզել են Էրազմի համալսարանի (Նիդեռլանդներ) գիտնականները:
MedicalXpress-ը հայտնում է, որ հետազոտողներն իրենց եզրակացությունները կատարել են 75 հազար մարդկանց 30-ամյա դիտարկումների ընթացքում ստացած տվյալների հիման վրա, որոնք այս տարիներին են մահացել: Նրանց մահվան տարեթվին տարիքը ճշգրիտ գրանցվել է:
Գիտնականները պարզել են, որ վերջին 30 տարում կյանքի միջին տեւողությունը զգակիորեն աճել է: Այսպես՝ Հոլանդիայում, օրինակ, եռապատկվել է այն մարդկանց թիվը, որոնք անցել են 95 տարվա շեմը: Չնայած այս ցուցանիշի աճին, առավելագույն տարիքը, որին մարդկությանը հաջողվել է հասնել, նախկինն է մնացել: Մարդիկ սկսել են ավելի երկար ապրել, սակայն ռեկորդները նախկինն են մնում: «Սա յուրատեսակ պատի է նման»,- պարզաբանել է հետազոտության հեղինակներից պրոֆեսոր Ջոն Էյնմալը:
Գիտնականի խոսքով՝ կանայք կարող են ապրել մինչեւ 115,7 տարեկան, իսկ տղամարդիկ մի փոքր պակաս՝ մինչեւ 114,1: Պրոֆեսոր Ջոն Էյնմալի խոսքով՝ առավելագույն տարիքը կախված չէ կյանքի մակարդակից: Դրա վրա չի ազդում ո՛չ սնվելու որակը, ո՛չ բժշկության որակը:
Այս ցուցանիշներից բարձր բոլոր թվերը պատահականությունների շարքից են: Այդպիսին է եղել ֆրանսուհի Ժաննա Կելմանի ռեկորդը: Նա ապրել է մինչեւ 122 տարեկան: Սա համարվում է գոյատեւման ամենաերկար ժամկետը: Կինը ծնվել է 1875 թվականին եւ մահացել 1997 թվականին:
Հետազոտության հեղինակների խոսքով՝ նման ռեկորդները ընդհանուր վիճակագրությունից դուրս են, սակայն չեն կարող նաեւ այն փոխել:
Հետևեք NEWS.am Medicine-ին Facebook-ում և Twitter-ում