Քաղցրացնող արհեստական նյութերի չարաշահումը կարող է ազդել գլյուկոզային օրգանիզմի արձագանքի վրա եւ զգալիորեն մեծացնել 2-րդ տիպի դիաբետի առաջացման հավանականությունը: Այսպիսի եզրակացության են հանգել University of Adelaide's medical school-ի գիտնականները:
Գիտնականների հետազոտությանը 27 մարդ է մասնակցել: Նրանցից մի քանիսը օրը 3 անգամ ուտելուց առաջ ընդունել են քաղցրացնող արհեստական նյութերի պարկուճներ (սուկրալոզա կամ ացեսուլֆամ), իսկ մյուսները՝ պլացեբո: Քաղցրացնող նյութերի օրական ընդհանուր չափաքանակը համարժեք էր այն քանակին, որը պարունակվում է «դիետիկ» գազավորված ըմպելիքի 1,4 լիտրից մի փոքր ավելիում:
2 շաբաթ անց քաղցրացնող արհեստական նյութերի պարկուճներ ընդունած կամավորների օրգանիզմի արձագանքը շաքարին փոխվել է, իսկ ստուգիչ խմբում ընդգրկվածների մոտ՝ ոչ: Գիտնականների խոսքով՝ քաղցրացնող նյութերի չարաշահումը կարող է դառնալ ուտելուց հետո մարդկանց արյան մեջ գլյուկոզայի մակարդակի կտրուկ բարձրացման պատճառ: Իսկ սա, ինչպես հայտնի է, մեծացնում է դիաբետի առաջացման հավանականությունը:
Մասնագետների խոսքով՝ դրանից բացի, քաղցրացնող նյութերը վտանգավոր են նաեւ այն պատճառով, որ մարդիկ մտածելով, թե «դիետիկ» մթերք են օգտագործում, դրանց հետ միասին օգտագործում են նաեւ այլ՝ վտանգավոր սնունդ:Մասնագետների կարծիքով՝ այս եզրակացությունների հաստատման համար անհրաժեշտ են ավելի ծավալուն հետազոտություններ:
Հետևեք NEWS.am Medicine-ին Facebook-ում և Twitter-ում