Հայաստանում բժշկության մեջ կան ուղղություններ, որոնք կարող են հետաքրքիր լինել մեր հարեւանների եւ գործընկերների համար: Այս մասին այսօր՝ սեպտեմբերի 26-ին, Հայ-ռուսական առողջապահական ֆորումի ժամանակ լրագրողների հետ զրույցում նշեց ՀՀ առողջապահության նախարար Լեւոն Ալթունյանը:
«Այդ ոլորտներից կարելի է առանձնացնել վիրաբուժությունը, ստոմոտոլոգիան: Ի վերջո, պետք է նշել Յոլյանի անվան արյունաբանական կենտրոնը, որտեղ երեկ մենք այց ունեցանք: Անձնակազմն ու սարքավորումները հիացրին մեր գործընկերոջը՝ ՌԴ առողջապահության նախարար Վերոնիկա Սկվորցովային», - հայտնեց ՀՀ առողջապահության նախարարը:
Լեւոն Ալթունյանը նշեց, որ ռուսական կողմի հետ քննարկվել է մի շարք ոլորտներում սերտ համագործակցության հարցը: Որոշվել է մշակել ռազմավարություն, որը կխթանի Հայաստանում բժշկական տուրիզմի զարգացումը:
«Բժշկական տուրիզմի առաջընթացն ապահովելու ծրագրի մեջ մտնում է ոչ միայն տեղեկատվական այցեքարտերի տպագրությունը, այլ՝ հարեւաններին բուժման նպատակով Հայաստան հրավիրելը», - հայտնեց Լեւոն Ալթունյանը:
Նախարարը նշեց, որ պետք է զարգացնել նաեւ բժշկության այն ուղղությունները, որոնք պահանջված են Հայաստանի բնակիչների կողմից: Ըստ նրա, դրանցից են ուռուցքաբանությունն ու սրտաբանությունը, որոնք մոտ ապագայում կլինեն ամենապահանջված ոլորտները:
Նշենք, որ սեպտեմբերի 26-ին մեկնարկել է Հայ-ռուսական առողջապահական 3-րդ համաժողովը, որի ժամաակ քննարկվում են երկու երկրների՝ ՀՀ-ի և ՌԴ-ի միջեւ առողջապահության ոլորտում համագործակցության հիմնական հարցերը: Համաժողովին մասնակցելու նպատակով Հայաստան է ժամանել Ռուսաստանի դաշնության առողջապահության նախարար Վերոնիկա Սկվորցովայի գլխավորած պատվիրակությունը:
Հետևեք NEWS.am Medicine-ին Facebook-ում և Twitter-ում