Առաջին անգամ Հայաստանում՝ «Էրեբունի» բժշկական կենտրոնում աբլյացիայի ժամանակ կիրառվել է Carto 3 եռաչափ նավիգացիոն համակարգ։
50-ամյա Մ․Ա․-ն դիմել էր «Էրեբունի» ԲԿ-ի Առիթմոլոգիական սրտաբանական կենտրոն պարոքսիզմալ տախիկարդիայի հաճախակի բռնկումների գանգատով: Պացիենտի խոսքով՝ վերջին տարիներին բռնկումները հաճախակիացել են եւ կրկնվում են գրեթե ամեն շաբաթ:
Որոշվել է էլեկտրաֆիզիոլոգիական ուսումնասիրություն անցկացնել հնարավոր աբլյացիայի կիրառմամբ: Պրոցեդուրան տեղային անզգայացմամբ իրականացրել է «Էրեբունի» ԲԿ-ի կաթետերացման լաբորատորիայում, Առիթմոլոգիական սրտաբանական կենտրոնի ղեկավար, բ․գ․ թ․Միհրան Մարտիրոսյանը:
Ըթացքում պարզ է դարձել, որ առիթմիայի օջախի հստակ որոշման, անվտանգ եւ արդյունավետ աբլյացիայի համար միջամտությունն անհրաժեշտ է շարունակել քարտեզավորման եռաչափ համակարգի միջոցով։
Առիթմիայի օջախների ռադիոհաճախականության աբլացիան հաջող եւ ապահով ավարտվել է: Հիվանդը Առիթմիոլոգիական բաժանմունքից դուրս է գրվել հենց հաջորդ օրը, վիճակը գնահատվել է բավարար:
Հիշեցնենք, որ «Էրեբունի» բժշկական կենտրոնը սրտի 3D քարտեզավորման CARTO 3 նորագույն համակարգի ներդրման մասին (3D mapping system CARTO 3) հայտարարել էր նոյեմբերի վերջին ։
«Էրեբունի» ԲԿ առիթմոլոգիական ծառայության ղեկավար Միհրան Մարտիրոսյանը լրագրողների հետ հանդիպման ժամանակ նշել էր, որ կատեթերային աբլյացիան այսօրվա դրությամբ առիթմիայի բուժման ամենաարդյունավետ եւ անվտանգ միջոցն է: Միջամտության ընթացքում ազդրի արյունատար անոթներից մեկով մտցվում է հատուկ կաթետեր, որի օգնությամբ մասնագետը գտնում է առիթմիայի համար «պատասխանատու» բջիջները եւ այրում դրանք:
Նախկինում այս միջամտության ընթացքում մասնագետներն ստիպված էին բավարարվել երկչափ պատկերներով, որոնք ստացվում էին ռենտգենի միջոցով, սակայն շնորհիվ CARTO 3 -ի այժմ նրանց հասանելի է եռաչափ պատկերը. դրա շնորհիվ նրանք կարող են աբլյացիայի միջամտությունը կատարել հնարավորինս արդյունավետ ու անվտանգ: Ավելին, այդպիսի միջամտության ժամանակ պացիենտը ավելի քիչ ռենտգեն ճառագայթում է ստանում, քան ավելի հին սարքավորման կիրառման դեպքում:
Հետևեք NEWS.am Medicine-ին Facebook-ում և Twitter-ում