Էփշթեյն-Բարի վիրուսն առաջացնում է ոչ միայն ինֆեկցիոն մոնոնուկլեոզ, որը նաեւ հայտնի է «համբույրի հիվանդություն» անվամբ, այլեւ աուտոիմունային 7 հիվանդություններ: Այս մասին հայտնում են Cincinnati Children's-ի գիտնականները:
Ինֆեկցիոն մոնոնուկլեոզին հատուկ է տենդը, բկերախի, ավշահանգույցների, լյարդի, փայծաղի ախտահարումը եւ արյան բաղադրության յուրահատուկ փոփոխությունը: Դրա պատճառը հերպեսի վիրուսների ընտանիքից Էփշթեյն-Բարի վիրուսն է: Գիտնականների խոսքով կյանքի ընթացքում Էփշթեյն-Բարի վիրուսի կրող է դառնում բնակչության 80-95 տոկոսը, վարակված քաղաքացիների 90 տոկոսից ավելին այն ձեռք է բերում դեռեւս մինչեւ 20 տարեկան դառնալը: Մարդկանց զգալի մասը նույնիսկ տեղյակ չէ, որ արդեն վարակվել է:
Նախորդ հետազոտությունները ցույց են տվել, որ կարմիր գայլախտի ախտորոշմամբ մարդկանց մեծ մասը մանկության տարիներին հիվանդացել է ինֆեկցիոն մոնոնուկլեոզով: Գայլախտի առաջացման հավանականությունը մեծացնում են նաեւ ուրիշ իմունային հիվանդություններ, օրինակ՝ շաքարային դիաբետը եւ ցրված սկլերոզը: Այս պաթոլոգիաները կապում են գրեթե 100 գեներում փոփոխությունների հետ:
Nature Genetics ամսագրում հրապարակված նոր հետազոտության ընթացքում մասնագետները պարզել են, որ Էփշթեյն-Բարի վիրուսն ազդում է իմունային բջիջների վրա: Այն ԴՆԹ-ն փոխակերպում է B լիմֆոցիտներում եւ փոխում հատուկ սպիտակուցների՝ տրանսկրիպցիայի գործոնների աշխատանքը: Այս մարկերները հետազոտողներին օգնել են գտնել Էփշթեյն-Բարի վիրուսի հետ կապված եւս մի քանի հիվանդություններ: Մասնավորապես՝ պարզվել է, որ Էփշթեյն-Բարի վիրուսը մեծացնում է կարմիր գայլախտի, 1-ին տիպի շաքարային դիաբետի, ցրված սկլերոզի, ռեւմատոիդ արթրիտի, պատանեկան իդիոպատիկ արթրիտի, ցելիակիայի եւ աղիների աուտոիմունային բորբոքային հիվանդությունների զարգացման վտանգը:
Հետևեք NEWS.am Medicine-ին Facebook-ում և Twitter-ում