Սննդակարգում սոյայի ընդգրկումը կարեւոր դեր է խաղում կանանց համար, հատկապես տարեց:
Միսուրիի համալսարանի մասնագետների հետազոտության համաձայն՝ կնոջ օրգանիզմում սոյայի մեծ պարունակությունը ոսկորների ամրացման եւ նյութափոխանակության լավացման երաշխիքն է: Առնետների վրա կատարվող փորձերի ժամանակ գիտնականներն ընտրել են թույլ ֆիզիկական ակտիվությամբ եւ ոսկորների նվազ ամրությամբ կրծողներին:
Առնետներին բաժանել են 2 խմբի: Առաջին խմբի կենդանիների մոտ դաշտանադադար նմանակելու համար ձվարանները հեռացվել են, երկրորդ խմբի կրծողների մոտ պահպանվել են: Առնետների մի մասին կերակրել են սոյայով, մնացյալին՝ եգիպտացորենով:
Պարզվել է, որ սոյայով սնված կրծողների ոսկորներն ամրացել են, իսկ նյութափոխանակությունն արագացել, ընդ որում՝ տվյալ դեպքում ձվարանների առկայությունը կամ բացակայությունը ոչ մի դերակատարում չի ունեցել: Առնետների մոտ, որոնց սննդակարգը կազմված էր եգիպտացորենից, դրական փոփոխություններ չեն դիտվել:
Գիտնականները պնդում են, որ ցանկացած տարիքի կին կարող է իր ոսկորների վիճակը բարելավել եւ նյութափոխանակությունն արագացնել սոյայի ակտիվ գործածմամբ: Ընտրություն կատարելիս կարելի է նախապատվությունը տալ սոյայի կաթին:
Հետևեք NEWS.am Medicine-ին Facebook-ում և Twitter-ում