Պակիստանի բնակիչը մարմնի վրա հարյուրավոր ուռուցքների պատճառով ստիպված մենակյացի կյանք է վարում:
The Daily Mail-ը հաղորդում է, որ 32-ամյա Ամիր Ալին գրեթե դուրս չի գալիս տանից, քանի որ շրջապատի մարդիկ նրան վարակիչ են համարում: Վաղ մանկությունից նրա որովայնին եւ մեջքին սկսեցին փոքր կոշտուկներ հայտնվել, սակայն 7 տարի առաջ բարորակ ուռուցքները տարածվեցին նաեւ ոտքերին, ձեռքերին, պարանոցին, գլխին եւ դեմքին: Ըստ բժիշկների, տղամարդը նեյրոֆիբրոմատոզի ծանր տեսակով է տառապում:
Առաջին տեսակի նեյրոֆիբրոմատոզը 3-4 հազար մարդուց մեկի մոտ են ախտորոշում: Նախկինում Ամիրը գումար էր վաստակում սպորտային տոկոսադրույքներով, սակայն հիմա դադարել է դրանով զբաղվել, քանի որ ցանկություն չունի տանից դուրս գալու:
Երկար տարիներ ուռուցքները չէին խանգարում Ամիրին, նա անգամ ամուսնացել է եւ երկու դուստր ունի: Սակայն 25 տարեկանում ուռուցքները սկսեցին արագորեն տարածվել ողջ մարմնով:
Նեյրոֆիբրոմատոզը ամենատարածված ժառանգական հիվանդություններից մեկն է, որը բնութագրվում է հիվանդի մոտ ուռուցքների առաջացմամբ:
Տղամարդկանց եւ կանանց մոտ հիվանդության առաջացման հաճախականությունը նույնն է, նկատվում է մոտավորապես ամեն 3500-րդ նորածնի մոտ:
Նեյրոֆիբրոմատոզի բուժման հիմնական մեթոդը ուռուցքների վիրահատական ճանապարհով հեռացումն է: Մեծաքանակ ուռուցքների դեպքում ռենտգենոթերապիա է նշանակվում: Բացի այդ, նյութափոխանակության բարելավման համար նշանակվում են նաեւ մի շարք դեղեր:
Հետևեք NEWS.am Medicine-ին Facebook-ում և Twitter-ում