Նորագույն տեխնոլոգիաներն օգնել են պարալիզացված պացիենտին մտքի ուժով կառավարել պլանշետը։ PLOS ONE պարբերականը հայտնում է, որ դա հնարավոր է դարձել BrainGate նեյրոինտերֆեյսի շնորհիվ, երբ չիպը ակտիվանում է գլխուղեղի շարժական կեղևում։
Ներկառուցված էլեկտրոդները թույլ են տալիս չիպին առանձին նյարդային բջիջների էլեկտրական ակտիվություն երևան բերել և ստացված տվյալները ուղարկել անմիջապես համակարգիչ։ Հետազոտության շրջանակներում BrainGate–ը տեղադրվել է երեք կամավորների ուղեղում։ Նրանցից երկուսը չեն կարողացել շարժել ձեռքերը և ոտքերը կողային ամիոտրոֆիկ սկլերոզի պատճառով, իսկ երրորդը պարալիզացվել է ողնուղեղի վնասվածքի պատճառով։
Կամավորների ապակոդավոված նեյտրոնային ազդակներն Bluetooth–ի միջոցով ուղարկվել են համակարգիչ, որից հետո համակարգը իմիտացրել է անլար մկնիկի աշխատանքը պլանշետի կառավարման ժամանակ։ Փորձի մասնակիցներին մնում էր միայն մտածել կուրսորի ու մկնիկի քլիքների մասին։
Արդյունքում պարալիզացված պացիենտները կարողացել են համացանցում գնումներ կատարել, օգտվել YouTube–ի որոնողական համակարգից և նույնիսկ էլեկտրոնային նամակներ ու չաթերում հաղորդագրություններ գրել։
Սրա հետ մեկտեղ կամավորներից մեկին հաջողվել է թվային դաշնամուրի վրա Բեթհովենի Ode to Joy ստեղծագործության մի հատված նվագել։
Գիտնականները հույս ունեն, որ նորագույն համակարգը կօգնի մարդկանց, որոնք տառապում են «ներսից փակված լինելու» ախտանիշով, երբ նկատվում է ցանկացած արտաքին ազդակների նկատմամբ մարդու ադեկվատ արձագանքի բացակայություն։
Հետևեք NEWS.am Medicine-ին Facebook-ում և Twitter-ում