Draper ընկերության ինժեներները նոր ապարանջան են ստեղծել, որի միջոցով կարելի է ախտորոշել դեպրեսիան: Ապարանջանը կոչվում է SysteMD (System with Sensors to Evaluate Mental Disorders – մտավոր խանգարումների ախտորոշման համակարգ):
Ֆիթնես-ապարանջաններն այսօր ամբողջ աշխարհում շատ տարածված են, այս գաջեթները հետեւում են այնպիսի ցուցմունքների, ինչպես՝ երակազարկը, քայլերի եւ այրած կալորիաների քանակությունը: SysteMD-ն, սակայն, այս բոլոր ապարանջաններից տարբերվում է եւ կարող է ախտորոշել դեպրեսիայի ու տագնապային վիճակի նշանները:
Համակարգի լիարժեք աշխատանքի համար նաեւ պահանջվում է գլխին հագցնել հատուկ սարք, որը նման է թեթեւ սաղավարտի կամ մազակալի: Իսկ ապարանջանները պետք է հագցնել դաստակին եւ կոճին, ինչը թույլ կտա միաժամանակ հետեւել սրտի զարկին, քրտնարտադրության քանակությանը, շնչառությանը եւ նույնիսկ բբի տրամագծին:
Այս ցուցանիշները հավաքվում եւ վերլուծվում են համակարգչով, իսկ արդեն ախտորոշումը կատարվում է դրանց հիման վրա:
Ինչպես հայտնի է, դեպրեսիայի դեպքերի մեծ մասը չախտորոշված է մնում, քանի որ մարդիկ ուղղակի չեն հասկանում, որ խնդիր ունեն եւ պետք է մասնագետի դիմել: Մինչդեռ դեպրեսիային բնորոշ ֆիզիկական ախտանիշները միանգամայն հնարավոր է հայտնաբերել, եւ այս սարքը թույլ է տալիս դա անել: Իսկ ժամանակին սկսված բուժումը մեծացնում է դեպրեսիայի տեւողության կրճատման հնարավորությունը եւ մարդու կյանքի որակը:
Հետևեք NEWS.am Medicine-ին Facebook-ում և Twitter-ում