Ինչու է պատվաստումը որոշ մարդկանց մոտ անվստահություն առաջացնում: Մաթեմատիկոսներին, կարծես թե, հաջողվել է գտնել այս հարցի պատասխանը:
Միացյալ Նահանգների Դարտմուտի քոլեջի գիտնականների կարծիքով, դա կարելի է բացատրել հիստերեզիսով, որն օգտագործվում է նաեւ սոցիոլոգիայում՝ բացատրելու համար հասարակական կարծիքի ձեւավորման եւ կառավարման գործընթացը:
Հիստերեզիսի ազդեցությունը հիմնականում կապված է ռիսկերից վախի եւ պատվաստումների արդյունավետության նկատմամբ մարդկանց անվստահության հետ: «Կրակի վրա յուղ է ավելացնում» բացասական փորձը կամ բացասական վերաբերմունքը պատվաստումներին: Բացասական վերաբերմունք են ձեւավորում, օրինակ, պատվաստանյութերի կլինիկական փորձարկումների ձախողումները, որոնց մասին տեղեկությունները մեծացնում են պատվաստումներին հանրային անվստահությունը:
Կասկածամտությունն աճում է պատվաստանյութերում կողմնակի ազդեցությունների առկայության պատճառով:
Եթե ելնենք ուսումնասիրության հեղինակների կազմած մաթեմատիկական մոդելներից, ապա հանրությունը պատրաստ կլինի ընդունել պատվաստանյութերն այն դեպքում, երբ դրանց արդյունավետությունը հասնի որոշակի ցուցանիշների: Միեւնույն ժամանակ, գիտնականների մեկ ձախողման կամ բացասական արձագանքների պատճառով բնակչության շրջանում պատվաստումների մակարդակը կարող է ընկնել ամենակարճ ժամանակում: Մինչդեռ պատվաստումների նկատմամբ վստահությունը վերականգնելու համար երկար տարիներ կպահանջվեն:
Փորձագետների կարծիքով, հնարավոր է բարելավել իրավիճակը`դրական վերաբերմունք ձեւավորելով հասարակության մեջ պատվաստանյութերի նկատմամբ՝ ավելի արդյունավետ պատվաստանյութեր ստեղծելու, ինչպես նաեւ հանրային իրազեկման բարձրացման (ներառյալ տարբեր քարոզարշավների) միջոցով:
Հետազոտությունը հրապարակվել է Proceedings of the Royal Society B ամսագրում։
Հետևեք NEWS.am Medicine-ին Facebook-ում և Twitter-ում