Մայիսի 18-ին Երեւանում AIOC II Հայկական Միջազգային ակնաբուժական համաժողովի շրջանակում հայտարարվեց Ակնաբույժների համահայկական ասոցիացիայի ստեղծման մասին: Ասոցիացիայի նախագահներն են պրոֆեսոր, մանկական ակնաբույժ Իգոր Ազնաուրյանը (Ռուսաստան) եւ պրոֆեսոր, ակնաբույժ Արտաշես Զիլֆյանը (Հայաստան):
Ազնաուրյանը իր ելույթում հատուկ նշեց, որ ակնաբուժության բնագավառի ռուս մասնագետները մեծ ոգեւորությամբ աջակցել են ակնաբույժների համահայկական ասոցիացիայի ստեղծման գաղափարին:
Նրա խոսքով՝ ԱՀԱ աշխատանքը ուղղված կլինի ամբողջ աշխարհի հայ մասնագետների միավորմանը` սկսած ԱՄՆ-ից եւ Եվրոպայից մինչեւ Հարավային Ամերիկա եւ Հարավարեւելյան Ասիա:
Ազնաուրյանը հայտնեց ծագումով հայ, Հայաստանի սահմաններից դուրս աշխատող ակնաբույժների ռեեստրի ստեղծման ծրագրերի մասին: Հետագայում նախատեսվում է նրանց ԱՀԱ-ի անդամակցության համար համապատասխան հրաավեր ուղարկել:
«Վստահ եմ, որ մենք կկարողանանք միավորել մասնագետների մեծ բանակ, ովքեր կաշխատեն Հայաստանում ակնաբուժության մեջ ժամանակակից տեխնոլոգիաների ներդրման ուղղությամբ», - ասաց նա:
Զիլֆյանը տեղեկացրեց, որ ԱՀԱ-ի ջանքերով, Հայաստանում եւ Ռուսաստանում, իսկ հետագայում նաեւ աշխարհի մյուս երկրներում, միջազգային համաժողովներ կկազմակերպվեն: Բացի այդ, հետագայում նախատեսվում է ակնաբուժության վերաբերյալ կլոր սեղաններ եւ սեմինարներ անցկացնել:
Հետևեք NEWS.am Medicine-ին Facebook-ում և Twitter-ում