ԱՀԿ-ն պաշտոնապես գերհոգնածությունը (զգայական սպառման համախտանիշ) հիվանդություն է ճանաչել: NEWS.am Medicine-ի հետ զրույցում հոգեբան Մարիամ Մեհրաբյանը նշեց, որ գերհոգնածությունը սթրեսների, նեւրոզների եւ դեպրեսիայի հետ միասին հաճախ է հանդիպում Հայաստանում:
Մասնագետը խորհուրդ է տալիս հատուկ ուշադրություն դարձնել աշխատանքային գրաֆիկին: Եթե աշխատանքային օրվա ընթացքում գրեթե հանգստանալու ժամանակ չկա, ապա դա կարող է բացասական ազդեցություն ունենալ:
Մեհրաբյանը նշում է, որ ծանրաբեռնվածությունը պետք է ճիշտ բաշխել, ինչը կօգնի խուսափել մասնագիտական սպառումից:
Չի կարելի մոռանալ, որ գերհոգնածությունը բացասաբար է ազդում ինքնագնահատականի վրա եւ կարող է նեւրոտիկ ախտանիշների պատճառ դառնալ:
Հիմնական ախտանիշները, որոնք վկայում են գերհոգնածության մասին, դա անքնությունն է, ախորժակի բացակայության հետ կապված ոչ կանոնավոր սնվելը:
«Գլխավոր ինդիկատորն այն է, երբ մարդը քնում եւ արթանանում է հոգնած», - նկատում է հոգեբանը:
Այդ դեպքում Մեհրաբյանը խորհուրդ է տալիս ուշադրություն դարձնել հանգստին. այցելել մշակութային միջոցառումների, զբաղվել սպորտով:
«Շատ արդյունավետ է լողով զբաղվելը, քանի որ դա օգնում է մարդու մարմինը եւ հոգին ներդաշնակ վիճակի բերել:
Կարելի է առանձնանալ, սուրճի բաժակի շուրջ պլանավորել ժամանակը: Ցավոք, այս պարզ գործողություները կարող են հաճախ որպես ժամանակի կորուստ դիտարկվել», - նկատեց նա:
Ցանկության դեպքում ծագած խնդիրները կարելի է քննարկել հոգեբանի հետ, ինչն, ըստ Մեհրաբյանի, շատ ավելի արդյունավետ կլիներ նյարդաբանի կոնսուլտացիայից:
«Նյարդաբանը սահմանափակվում է հանգստացնող դեղամիջոցների նշանակմամբ, իսկ դա անարդյունավետ է պացիենտի անձնային աճի տեսանկյունից: Մինչդեռ հոգեբանն աշխատում է հենց այդ ուղղությամբ», - ասաց փորձագետը:
Հետևեք NEWS.am Medicine-ին Facebook-ում և Twitter-ում