Իսրայելական ReWalk սթարթափի վերջին նորարարությունը` կաթվածահար հիվանդներին ինքնուրույն տեղաշարժվելու հնարավորություն ընձեռող առաջին էկզոկմախք-ռոբոտը սննդամթերքի եւ դեղամիջոցների նկատմամբ վերահսկողություն իրականացնող ԱՄՆ դաշնային գործակալության հավանությանն է արժանացել:
Փորձագետների գնահատմամբ, սարքը ոչ միայն ստացիոնար պայմաններում, այլ նաեւ` տանը կարելի է օգտագործել: Գոտկատեղից ներքեւ կաթվածի ենթարկված հիվանդները, նորույթի շնորհիվ, կարող են հենակների վրա հավասարակշռություն պահպանել եւ անվտանգ տեղաշարժվել, հաղորդում է «The Times Of Israel»-ը:
Գյուտի հեղինակը` վթարի արդյունքում հաշմանդամի սայլակին գամված Ամիթ Գոֆերը, շուրջ 10 տարի նպատակաուղղված աշխատանք է տարել` քայլելու կարողությունը վերականգնելու համար:
2014թ. հունիս ամսին Forbes ամսագիրը ReWalk-ի անունը աշխարհը դեպի լավը փոխող լավագույն 10 բժշկական սթարթափների ցանկում է ներառել:
Համակարգն իրենից կոնքերի, ծնկների եւ ոտնաթաթերի շարժումները վերահսկող հատուկ շարժիչներով զինված տարրերի համադրություն է ներկայացնում. 21 կգ քաշ ունեցող մետաղապատ էկզոկմախքի կազմի մեջ նաեւ շարժման տվիչներ են ներառված: Հատուկ կոստյումը համակարգիչ եւ մարտկոց ընդգրկող ուսապարկի օգնությամբ հիվանդի կոնքերից եւ ուսերից է ամրացվում:
Ողնուղեղի տարբեր վնասվածքներ ունեցող հիվանդների համար նախատեսված էկզոկմախքը ներկայումս հասանելի է Իսրայելում, ԱՄՆ-ում, Թուրքիայում, Գերմանիայում, Ֆրանսիայում, Իտալիայում, Մեծ Բրիտանիայում եւ Ավստրիայում: Սարքի գինը մոտ 70 հազար ԱՄՆ դոլար է կազմում:
Հետևեք NEWS.am Medicine-ին Facebook-ում և Twitter-ում