Գամալեի անվան ինստիտուտի (Ռուսաստան) մասնագետները ներկայացրել են գրիպի եւ կորոնավիրուսի դեմ համակցված պատվաստանյութ։ Այս մասին հայտնել է կենտրոնի գլխավոր գիտաշխատող Վիկտոր Զուեւը, փոխանցում է medportal-ը։
«Գամալեի անվան համաճարակաբանության եւ մանրէաբանության մեր կենտրոնում,- ես դա լսել եմ մեր տնօրենի շուրթերից,- նույնիսկ համակցված պատվաստանյութ ստեղծելու մտադրություն կա՝ ե՛ւ կորոնավիրուսային ինֆեկցիայի դեմ, ե՛ւ գրիպի»,- «Ռոսիա 2» հեռուստաալիքի եթերում ասել է Զուեւը։
Նրա խոսքով՝ խոսքը, հավանաբար, վերաբերում է բինարային ազդեցության դեղամիջոցին․ այն ներարկվելու է 2 փուլով, ինչպես եւ կորոնավիրուսային ինֆեկցիայի դեմ ընթացիկ պատվաստանյութը։
Հիշեցնենք, որ Ռուսաստանի առողջապահության նախարարության Գամալեի անվան ինստիտուտը կորոնավիրուսային ինֆեկցիայի կանխարգելման համար մշակել է ՌԴ-ում առաջին «Սպուտնիկ V» վեկտորային պատվաստանյութը։ Այն ստեղծվել է անվտանգ ադենովիրուսի հիման վրա, որն օգտագործվում է որպես օրգանիզմ կորոնավիրուսի առանձին սպիտակուցներ հասցնելու կոնտեյներ։
Հետևեք NEWS.am Medicine-ին Facebook-ում և Twitter-ում