Տղամարդիկ, տարեցներ եւ ծխողներ. Գիտնականները պատմել են մարդկանց մասին, որոնք ավելի շատ են ենթակա կորոնավիրուսով վարակվելուն

Տղամարդիկ, տարեցները եւ ծխողները շնչուղիներում որոշակի առանձնահատկություններով են օժտված, որոնք նրանց խոցելի են դարձնում կորոնավիրուսի առաջ, պարզել է գիտնականների միջազգային խումբը, ներառյալ City of Hope-ի մասնաճյուղ Տրանսլյացիոն գենոմիկայի հետազոտական ինստիտուտը (TGen):

Նոր հետազոտության արդյունքները հրապարակվել են Nature Medicine ամսագրում:

Մարդու միաբջջային  ՌՆԹ-ի եւ Ատլաս բջիջների (սա սպառիչ տեղեկատվական քարտերի լրակազմն է, որը նկարագրում եւ որոշում է առողջության ու հիվանդության բջջային հիմքը) գենային սեքվենիրացման տվյալները հետազոտողներին հնարավորություն են ընձեռել վերլուծելու SARS-CoV-2 վիրուսի ազդեցությունը COVID-19-ով չհիվանդացած 228 առողջ մարդկանց քթի, շնչուղիների եւ թոքերի հյուսվածքների նմուշների ավելի քան 1,3 մլն բջիջների վրա:

Պարզվել է, որ տարիքը, ծխելը եւ սեռը կարեւոր դեր են խաղում բջիջներ ներթափանցելու եւ վերարտադրվելու SARS-CoV-2-ի ունակության հարցում:

Տղամարդկանց, տարեցների եւ ծխողների մոտ ACE2 ֆերմենտն ավելի արտահայտված է, իսկ դա նշանակում է, որ կորոնավիրուսի համար ավելի հեշտ է թափանցել այդ բջիջներ եւ դրանք վարակել: Տղամարդկանց եւ տարեցների մոտ նաեւ ավելի է արտահայտված TMPRSS2-ը՝ գեն, որը վիրուսի մակերեւույթին մասնատում է Spike սպիտակուցները՝ նպաստելով դրա ներթափանցմանը մարդու բջիջներ: Հետազոտողները TMPRSS2-ից բացի, նաեւ հայտնաբերել են լրացուցիչ ֆերմենտներ, որոնք նույնպես վիրուսին թույլ են տալիս վարակել օրգանիզմը:

Հետևեք NEWS.am Medicine-ին Facebook-ում և Twitter-ում