Եվրոպացի սրտաբանների ասոցիացիայի՝ նախընթաց երկու օրերին՝ Բարսելոնայում տեղի ունեցած տարեկան համաժողովի ընթացքում շվեյցարացի գիտնականները նոր՝ առանց մարտկոցի աշխատող կարդիոխթանիչ են ներկայացրել, որը, ձեռքի ժամացույցի նմանությամբ, ինքնակառավարման ոլորունի մեխանիզմով է աշխատում, հաղորդում է NewsMax Health-ը:
Ժամանակակից կարդիոխթանիչները, սրտի աշխատանքի ռիթմի կարգավորման տեսանկյունից, բարձր արդյունավետությամբ են աչքի ընկնում, սակայն մեկ լուրջ խնդիր՝ լիցքավորման կարիք ունեն: Իսկ սարքի մեջ տեղակայված մարտկոցի փոխարինումը հավելյալ լիարժեք վիրահատություն է պահանջում: Մարտկոցների հրաժարվելու եղանակը Բեռնի համալսարանը ներկայացնող ինժեներ Ադրիան Զուրբախենն է գտել: Նրա աշխատանքի հիմքում Abraham-Louis Perrelet մակնիշի շվեյցարական գրպանի ժամացույցների համար 1777թ.-ին մշակված ինքնակառավարման ոլորունի մեխանիզմն է: Այսինքն՝ ինչպես որ ձեռքի ժամացույցն է դաստակի շուրջ շարժի արդյունքում՝ զսպանակի լարմամբ աշխատում, այնպես էլ կարդիոխթանիչը կարող է, սրտամկանի շարժն օգտագործելով, էլեկտրական հոսանք ստեղծել: Սակայն այս պարագայում կարդիոխթանիչն ուղիղ սրտի մեջ տեղակայելու անհրաժեշտություն է առաջանում:
Լաբորատոր խոզերի նկատմամբ իրականացված փորձարկումների ընթացքում խթանիչը սրտի՝ րոպեի ընթացքում 130 հարվածի չափով կանոնավոր աշխատանք ապահովելու կարողություն է դրսեւորել: Մարդկանց նկատմամբ փորձարկումների մեկնարկի մասին դեռեւս ոչինչ չի հաղորդվում:
Հետևեք NEWS.am Medicine-ին Facebook-ում և Twitter-ում