Cleveland Clinic-ի ամերիկացի բժիշկների իրականացրած հետազոտությունը պարզել է, որ 4PY մետաբոլիտի բարձր մակարդակը, որն առաջանում է նիկոտինաթթվի (վիտամին B3) տրոհման ժամանակ, կապված է սրտային հիվանդությունների (ինչպիսին են ինֆարկտները եւ ինսուլտները) առաջացման ավելի մեծ հավանականության հետ։
Հետազոտողներն ուսումնասիրել են ԱՄՆ-ից եւ Եվրոպայից ավելի քան 3 000 մեծահասակների արյան նմուշները ՝ հետեւելով 4PY մետաբոլիտի մակարդակին եւ սիրտ-անոթային հիվանդությունների դեպքերին երեք տարվա ընթացքում։ Արդյունքները ցույց են տվել, որ 4PY-ի բարձր մակարդակ ունեցող մարդկանց մոտ միջինը 60 տոկոսով ավելի բարձր է եղել սրտի եւ անոթների լուրջ հիվանդությունների բախվելու հավանականությունը։
Կենդանիների վրա կատարված լրացուցիչ փորձերը հաստատել են, որ 4PY-ի ավելորդ քանակությունը կարող է հանգեցնել անոթների բորբոքման, ինչն, իր հերթին, մեծացնում է սիրտ-անոթային խնդիրների առաջացման հավանականությունը։
Հետաքրքիր է իմանալ, որ վիտամին B3-ը լայնորեն տարածված է շատ սննդամթերքներում, ինչպիսին են սերմերը, լոբին, կանաչեղենը եւ ամբողջահատիկները, եւ ավելացվում է հիմնական սննդամթերքներին որոշ երկրներում՝ այդ վիտամինի պակասը կանխելու համար։ Նկատվել է նաեւ հետաքրքրության աճ նիկոտինաթթվի հիմքի վրա պատրաստված հավելումների հանդեպ, որոնք վաճառվում են որպես միջոցներ ծերացման դեմ եւ կարող են կարեւոր նշանակություն ունենալ սրտի եւ անոթների հիվանդությունների համար։
Այս բացահայտումը ընդգծում է օրգանիզմում վիտամին B3-ի մակարդակի հավասարակշռման եւ հավելումների օգտագործման հանդեպ ուշադիր լինելու կարեւորությունը, հատկապես սրտի առողջությունը պահպանելու իմաստով։ Հետագա հետազոտություններն այս ոլորտում կօգնեն ավելի լավ հասկանալ այն մեխանիզմները, որոնք ընկած են վիտամին B3-ի եւ սիրտ-անոթային հիվանդությունների միջեւ կապի հիմքում, ինչպես նաեւ ստեղծել ավելի արդյունավետ միջոցներ այդ հիվանդությունների կանխման եւ բուժման համար։
Հետևեք NEWS.am Medicine-ին Facebook-ում և Twitter-ում