Ֆինլանդիայի Օուլու համալսարանի իրականացրած հետազոտության համաձայն՝ վաղ դաշտանադադարը կարող է աշխատունակության վատացման եւ 46 տարեկանում հաշմանդամության թոշակի անցնելու պատճառ լինել։ Հետազոտության արդյունքները հրապարակվել են Menopause ամսագրում։
Նշվել է, որ Ֆինլանդիայում միջինը կանանց մոտ դաշտանադադարն սկսվում է 51 տարեկանում։ Դա այն շրջանն է, երբ ձվարանների աշխատանքը դանդաղում է, ինչը հանգեցնում է դաշտանի դադարելուն։ Դաշտանադադարը համարվում է վաղ, եթե սկսվում է մինչեւ 45 տարեկանը։
Հետազոտության ընթացքում, որին մասնակցել է 2 700 կին, գիտնականները պարզել են, որ դաշտանադադարն ավելի վաղ տարիքում հարաբերակցվում է գործազրկության աճի եւ թոշակի անցնելու բարձր ռիսկի հետ՝ հաշմանդամության հետ կապված։ Հետազոտողներն այսպիսի եզրակացությունների են եկել՝ ուսումնասիրելով դեղատներում հորմոններին փոխարինող դեղամիջոցների դուրսգրման եւ գործազրկության մակարդակի մասին տեղեկության (որը տրամադրել է Ֆինլանդիայի սոցիալական ապահովագրության վարչությունը) տվյալները։ Հետազոտության մասնակիցների հարցումը նաեւ ցույց է տվել, որ կանայք, որոնց դաշտանադադարը սկսվել է 46 տարեկանում, ավելի հաճախ են անաշխատունակության նվազում նկատել նրանց համեմատ, ովքեր դեռ այդ վիճակում չեն հայտնվել։ Դաշտանադադարի դիտարկումների երկու տարիների ընթացքում աշխատանքային գրքույկներում գրանցվել է անաշխատունակ օրերի ավելի շատ քանակություն (99 տոկոսով) եւ գործազրկության շրջանների տեւողության ավելացում (16 տոկոսով)։
Նշվել է նաեւ, որ դիտարկումների յոթ տարիների ընթացքում կանանց 5,6 տոկոսը դաշտանադադարի շրջանում անցել է հաշմանդամության թոշակի, այն դեպքում, երբ վերահսկիչ խմբի կանանց ցուցանիշը կազմել է 3,3 տոկոս։
Գիտնականները ենթադրել են, որ այս արդյունքները կարող են կապված լինել կանանց ինքնազգացողության վատացման հետ դաշտանադադարի ժամանակ։ Փոփոխություններն օրգանիզմում՝ կապված հորմոնալ ֆոնի փոփոխման հետ, կարող են ուղեկցվել համալիր վեգետատիվ-անոթային, հոգեկան եւ էնդոկրին խախտումներով։
Հետևեք NEWS.am Medicine-ին Facebook-ում և Twitter-ում