Երկուսուկես տարեկան աղջկա մոտ H5N1 թռչնագրիպի թեստը դրական է եղել և նրան տեղափոխել են Ավստրալիայի հիվանդանոցներից մեկի ինտենսիվ թերապիայի բաժանմունք, հայտնում է Առողջապահության համաշխարհային կազմակերպությունը:
«Չնայած այս դեպքում վիրուսի աղբյուրն առայժմ անհայտ է, սակայն վարակումն, ամենայն հավանականությամբ, տեղի է ունեցել Հնդկաստանում, որտեղ աղջիկը ճանապարհորդել է, և որտեղ վիրուսների այս խումբը նախկինում հայտնաբերվել է թռչունների մոտ», - ավելացրել է ՄԱԿ-ի առողջապահական գործակալությունը:
ԱՀԿ-ն ընդհանուր բնակչության համար այս վիրուսով վարակվելու ռիսկը ցածր է գնահատում։ Աղջիկը Կալկաթայում է եղել փետրվարի 12-29-ը։ Քաղաքում գտնվելու ընթացքում նա չի շփվել հիվանդ մարդկանց կամ կենդանիների հետ։
Աղջնակը Ավստրալիա է վերադարձել մարտի 1-ին և հաջորդ օրը տեղափոխվել Վիկտորիա նահանգի հիվանդանոց: Մարտի 4-ին նա մեկ շաբաթով տեղափոխվել է նահանգի մայրաքաղաք Մելբուռնի ինտենսիվ թերապիայի բաժանմունք՝ ախտանիշների սաստկացման պատճառով։ Երկուսուկես շաբաթ անց նա դուրս է գրվել հիվանդանոցից։
Հետևեք NEWS.am Medicine-ին Facebook-ում և Twitter-ում