Հունիսի 29-ին ՀՀ ԱՆ Առողջապահության ազգային ինստիտուտում, «Ավետիս» առողջապահության ինֆորմատիկ կրթական ծրագրի շրջանակներում կայացավ «Թվային առողջապահություն Հայաստան» ամենամյա համաժողովը:
Հայաստանում Թվային առողջապահության ներդրման հաջողությունների ու խնդիրների քննարկմանը նվիրված համաժողովի բացումն ազդարարեցին ՀՀ ԱՆ ԱԱԻ-ի տնօրեն Ալեքսանդր Բազարչյանը, ԱԱԻ-ի Էլեկտրոնային առողջապահության ներդրման բաժնի ղեկավար Ծաղկանուշ Սարգսյանը և «Ավետիս» առողջապահության ինֆորմատիկ կրթական ծրագրի տնօրեն Արմինե Լուլեջյանը։
Բուժաշխատողի լիցենզիայի հայտից մինչև պացիենտին մատուցվող ծառայություններ՝ առողջապահական համակարգի բոլոր օղակների թվայնացման նպատակը քաղաքացուն որակյալ ծառայություններ, բուժաշխատողին թվային արդյունավետ գործիքներ տալն է: Իսկ այդ ամենի արդյունքում ստեղծվում է վերլուծություններ ու կանխատեսումներ անելու լայն հնարավորություն, ինչը կարևոր նախապայման է մշտապես կատարելագործվելու ճանապարհին:
Թվային առողջապահություն Հայաստան» ամենամյա համաժողովն ընթացավ «Ավետիս» առողջապահության ինֆորմատիկ կրթական ծրագրի մասնակիցների ելույթներով, որոնցում ներկայացվեցին ոլորտի տեխնոլոգիական նորարարություններն ու հետագա քայլերի տեսլականը: Ի դեպ, մեր երկրի ձեռքբերումներն այս ոլորտում մինչ օրս ներկայացվել են մի շարք միջազգային հարթակներում՝ արժանանալով բարձր գնահատականի: Այսօր արդեն հայ բուժաշխատողների շրջանում թվային մտածողությունը դառնում է աշխատաոճ՝ խթանելով գործընկերային համագործակցությանն ու առողջապահության ոլորտի համապարփակ զարգացմանը:
Հետևեք NEWS.am Medicine-ին Facebook-ում և Twitter-ում