Փորձարարական պատվաստանյութը կարող է նոր հույս տալ այն կանանց, որոնց մոտ ախտորոշվել է կրծքագեղձի քաղցկեղի ագրեսիվ և դժվար բուժելի ձևը, ասվում է նոր ուսումնասիրության մեջ:
Պատվաստանյութը, ըստ երևույթին, անվտանգ և արդյունավետ է կրծքագեղձի եռակի բացասական քաղցկեղի դեմ, մի տեսակ, որը հնարավոր չէ բուժել հորմոնալ թերապիայի միջոցով, քանի որ այն պայմանավորված չէ երեք հորմոններից որևէ մեկով, որոնք սովորաբար նպաստում են կրծքագեղձի քաղցկեղի զարգացմանը:
Ըստ Genome Medicine ամսագրում հրապարակված արդյունքների, 18 հիվանդներից 16-ը քաղցկեղով չեն հիվանդացել պատվաստանյութը ստանալուց երեք տարի հետո, որը սովորեցրել է նրանց իմունային համակարգին ոչնչացնել մնացած քաղցկեղային բջիջները:
Համեմատության համար, համաձայն վիճակագրական տվյալների, վիրահատության ենթարկված հիվանդների միայն կեսն է երեք տարի հետո քաղցկեղից զերծ մնում:
Վաղ կլինիկական փորձարկմանը մասնակցել է կրծքագեղձի եռակի բացասական քաղցկեղով 18 հիվանդ, որը տարածված չի եղել մարմնի այլ մասերում:
Կրծքագեղձի քաղցկեղի դեմ պայքարի ազգային հիմնադրամի տվյալներով, ԱՄՆ-ում հանդիպող կրծքագեղձի քաղցկեղի մոտ 10-15%-ը եռակի բացասական է:
Մինչ օրս կրծքագեղձի եռակի բացասական քաղցկեղը թիրախային թերապիա չունի: Այն պետք է բուժել ավանդական մեթոդներով, ինչպիսիք են վիրահատությունը, քիմիաթերապիան և ճառագայթային թերապիան, ասվում է հետազոտողների տեղեկատվության մեջ:
Գիտնականների վկայությամբ, հետազոտությանը մասնակցած բոլոր հիվանդները քիմիաթերապիայի կուրս են անցել, որից հետո կրծքագեղձի ուռուցքների հեռացման վիրահատություն են տարել։ Հետազոտական թիմը վերլուծել է ուռուցքային հյուսվածքը վիրահատությունից հետո՝ հայտնաբերելու հիվանդների քաղցկեղի բջիջներում եզակի գենետիկ մուտացիաները:
Այնուհետև նրանք մշակել են անհատականացված հակաքաղցկեղային պատվաստանյութ յուրաքանչյուր հիվանդի համար՝ հիմնվելով այդ մուտացիաների վրա: Յուրաքանչյուր հիվանդ ստացել է պատվաստանյութի երեք չափաբաժին, որը սովորեցրել է նրանց իմունային համակարգին ճանաչել կրծքագեղձի յուրահատուկ ուռուցքների հիմնական մուտացիաները և գրոհել քաղցկեղի բջիջների վրա, ասում են հետազոտողները:
Արդյունքները ցույց են տվել, որ կրծքագեղձի եռակի բացասական քաղցկեղով 18 հիվանդներից 14-ի մոտ իմունային պատասխան է առաջացել պատվաստանյութի նկատմամբ:
Հետևեք NEWS.am Medicine-ին Facebook-ում և Twitter-ում